E partido mas grandi den formacion, esta Movimiento Electoral di Pueblo (MEP), ta pasando dor di basta reto pa logra acomoda tur e candidatonan cu ta aspira un puesto ehecutivo den e siguiente Gabinete. E partidonan MEP, POR y RED a firma un acuerdo pa forma e siguiente coalicion, cu hunto ta yega na 12 asiento di e 21 asientonan den Parlamento. Pero e nombernan na cada Ministerio ainda ta un reto.
Critica riba Facebook
Den fin di siman a sigui varios desaroyo, specialmente riba red social, unda esunnan di candidatonan prominente a expresa nan desapunto pa e forma con ta atendiendo e proceso di formacion. Sinembargo, siman a habri cu mas di e tipo di mensahenan cu ta subi red social. Basicamente ta mustra desapunto pa e direccion di e negociacionnan.
Comision di Formacion
Asina a nota cu e comision di formacion lo a sugeri pa tin un solo persona den e funcion di Minister di Finansa y Infrastructura. Parce cu esey a causa disgusto cerca e otro candidatonan, pasobra lo crea funcion di un “Super Minister” dor di dune un solo persona dos cartera prominente asina, cu mas di 2 mil empleado publico bou di dje.
Den formacion di coalicion y gabinete di gobernacion, ta tene cuenta cu algun cartera principal, cu ta Asuntonan General, Finansa, Husticia, Infrastructura, Salud Publico, Enseñansa, Labor, Economia y Turismo. Locual ta sosode ta cu ta inclui algun “post” adicional pa duna e Ministerio mas “peso” manera Telecomunicacion, Transporte, Labor, Integracion, Energia, Utilidad, Sector Primario, Maneho di nos Grandinan, Maneho di Adictonan, Organisacionnan Gubernamental y asina por sigui menciona. Claro cu cada formacion ta adapta e LIM (Landsverorodering Instelling Ministeries” basa riba e acuerdo di gobernacion. Esey ta pone cu departamentonan ta pasa di un Ministerio pa otro. Por ehempel DIMAS ta resorta awo bou di Ministerio di Integracion por bay resorta bek bou di Husticia.
E candidatonan cu awor ta mencionando pa bira Minister den seno di partido MEP ta:
ü Evelyn Wever, cu a logra 3503 voto den eleccion di dia 22 di september ultimo, cu a conoce un adelanto di 107 voto for di su 3396 votonan den eleccion di aña 2013.
ü Xiomara Ruiz-Maduro, cu a logra 2696 voto den e ultimo eleccion, un crecemento di 251 voto for di 2445 voto den eleccion di 4 aña pasa.
ü Crispin “Chris” Romero, cu a logra 1048 voto, cu a cay cu 226 voto comparando cu su 1273 votonan obteni den eleccion di 2013.
ü Danguillaume “Dangi” Oduber cu a logra 2399 voto, cu a bira e candidato cu mas a crece den MEP den eleccion 2017, si considera cu el a bay 650 voto padilanti, for di 1749 cu e tabatin 4 aña pasa.
ü Glenbert Croes, cu a logra a record di voto den su carera politico, subiendo for di 2366 di aña 2013 pa 2491 den e ultimo eleccion, creciendo cu 125 voto.
Partido MEP
Gilberto F. “Betico” Croes a funda Movimiento Electoral di Pueblo (M.E.P) dia 9 di Februari 1971 cu ideologia “Social Democrata”. E partido a conoce tres lider te awor, cu ta Gilberto F. “Betico” Croes, Nelson O. Oduber y Evelyne Wever-Croes. Nan a participa 17 biaha den eleccion. Nan record maximo di voto ta 25172 voto na aña 2001, mientras cu nan record minimo di voto ta 8095 na aña 1973. Mester menciona cu den eleccion di aña 2001, e partido a logra su record den cantidad di voto, pero a cay den e siguiente 3 eleccionnan consecutivo. Awor den eleccion 2017, como e di dos eleccion cu Evelyn Wever como lider, e partido a crece di 17.653 pa 22.061 cu ta un aumento di 4.408 voto.
