Pa trece na conocemento publico, mi nomber ta Francisco Figaroa, miho conoci riba Facebook como Fransy Figaroa. M’a haya mi mes obliga di reacciona riba e tantisimo inbox, sms, yamada telefonico pa puntra tocante dicon mi no a reacciona tocante e rectificacion di mi casa Andreina Morillo. Na prome luga mi no ta mete den trabou di mi casa (periodista) pero si mi ta bay reacciona personalmente.
Normal mi no ta haci esaki pero mi ta bay trece dilanti loke mi ta pensa di Sharlene Starke y e tres punto cu bo a pone den bo Facebook cu ta lo siguiente:
• Bo prome punto ta señala: Mirando cu señora Morillo ta indica cu mi a leak informacion medico confidencial, mi lo kier puntra un prueba/copia di e informacion medico confidencial y prueba/aclaracion cu mi persona a leak esaki. Tocante e punto aki, mi persona kier corigi bo, aunke semper bo ta emocional, mi ta cita bo mesun texto riba Facebook, “Como persona (no como trahado di gobierno of politico) mi a ricibi un forwarded message y como ciudadano/mama preocupa mi a forward esaki pa 2 groupchat di confiansa cu e unico meta pa concienticacion.”
Tocante esaki, mi ta bay referi bo na Ministerio Publico su declaracion e cual ta: “E ciudadano cu intencionalmente publica of plama informacion secreto, perhudicando otro hende, tambe ta comete un hecho castigabel.” Y si bo no ta di acuerdo cu esaki, bay reclama Yolanda Pronk.Mi ta bay educa bo riba e tema aki, bo ta asina emocional cu bo ta declara riba bo Facebook post, wak bo punto 3, cu ta bisa: “Mi a comparti e informacion cu 2 grupo di confiansa como mama preocupa y cu e miho intencionnan mirando e aumento drastico den caso positivo”.
Mi kier haci bo un pregunta personal, si bo tin un malesa di caya, AIDS, herpes, problema cu alcohol of problema psikiatrico, esey ta autorisa mi pa comparti bo informacion medico sin cu bo a duna mi permiso, pa conscientisa manera abo mes a declara den bo punto 5? Cu ta bisa: “Na e momento ey mi a sintimi como mama y ciudadano di pais Aruba cu e obligacion pa conscientisa otro mayornan pa loke ta trata e desaroyonan rond di Covid. Mi ta di opinion cu pa siguridad y proteccion di tur ciudadonan tur hende mester ta mas tanto na altura. Esaki ta un opinion personal di mi persona.
Den bo di dos punto cu ta lo siguiente 2- Sra. Andreina Morillo a yamami via mi celular priva riba diaranson anochi pa hacimi e pregunta cu si mi persona tabatin autorisacion di e persona en cuestion pa forward e mensahe cu mi a haña. Na ningun momento e no a bisami cu ta trata di un interview pa Bon Dia Aruba of cu e lo publica e contenido di nos combersacion. Mi kier sa di Bon Dia Aruba/Andreina Morillo si el a grabami e anochi ey y si ta asina mi lo desea (un copia) di e prueba na unda mi ta duna su persona autorisacion pa usa e contenido di e combersacion den un articulo pa Bon Dia Aruba.
Di esaki mi no ta bay reacciona riba bo mes, un periodista no ta yama bo pa bebe koffie pasobra e no ta bo amiga y mi ta recordabo cu abo a laga mi un tape recorder marca Sony cu si bo kier mi lo publica loke tin aden of si bo kier mi lo mande pa bo y asina refresca bo memoria, please laga mi sa.
Di bo punto 3, Ultimo pregunta cu mi tin, ta cu mi kier sa kico e intencion tabata ta di e articulo cu a sali ful page na color riba pagina A3.Esaki no ta ni relevante mes, si supuestamente bo ta Bachelor’s degree – Law mi por wak caba ki tipo di hurista bo lo bira un dia.
E lo ta bon pa bo cu Glenson Oduber, ruman di minister Dangui Oduber cu a yama mi pa laga bo na paz “Stop di perde tempo cu Sharlene, e informacion ta secreto medico bo no mag di share cu ningun hende riba Whatsapp”.
Esaki ta conta pa tur hende, no ta importa ken bo ta pero secrecia of informacion medico no ta importa di ki contexto bo comparti’e sin autorisacion di e doño di curpa esey ta castigabel, nos tur tin responsabilidad civico si nos kier gana e virus di Covid-19 aki nos tur tin cu duna nos parti, baha tur bandera politico y subi esun di Aruba, e dia ey nos lo crush the curve, na final di dia nos tur ta keda biba riba e pais aki.
