Mas cu un aña pasa a anuncia cu ta hopi urgente pa privatisa rioolwaterzuiveringsinstallatie (RWZI), pasobra gobierno mes no por modernisa e planta for di su recursonan. Gobierno a tuma e decision, pero ainda e procedura legal no a finalisa. A pesar cu tin un consensus cu esaki mester tuma luga. Incluso tin e ley prepara pa cobra un porcentahe extra riba environmental levy.
Na momento cu e gobernacion aki a inicia, Prome Minister mr. Evelyn Wever-Croes a splica, a pone e asunto aki den man di Minister di Naturalesa Ursell Arends y Minister di Energia Glenbert Croes. A traha un comision di e departamento y ministerionan concerni cu a busca e miho solucion pa Aruba.
“Mi a haya e proposicion entrega un tremendo solucion y mi sa cu otro solucion no tin pa esaki,” Wever-Croes a bisa.
Awo ta en espera pa e concepto di ley cu ta traspasa RWZI pa e empresa crea door di Utilities N.V., pasa den parlamento. Y esaki ta urgente pasobra ta papia di un planta di cincuenta (50) aña bieu, cu pa hopi tempo no a haya e debido mantencion y cu no ta soporta mas e peso di procesa asina hopi awa di desperdicio cu ta bay pa e planta na Bubali.
E ariba menciona tambe tin e prome mandatario preocupa. E tardansa tabata mas bien den e proceso prome cu e concepto di ley yega parlamento. Esaki pasobra ta trata di privatisacion di un seccion di gobierno y combina cu e parti di heffing, e cobransa, cu tambe ta un tema delicado cu mester a discuti hopi bon prome cu tuma un decision con ta bay garantisa e parti financiero di e empresa.
E ley ta na parlamento y si tur cos ta bon, segun e mandatario, e siman aki mester haya e pregunta di e parlamentarionan. Gobierno mester contesta mas lihe posibel pa e bay un reunion publico cu esaki.
