Diadomingo tabata un dia hopi special. Rib’e dia aki, famia- y amigonan a organisa un evento den cual nan a reconoce y honra Francisco “Tico” Kock pa su añanan di experiencia riba tereno di musica. Y su coleganan, su famia-, amigo- y musiconan kier a felicit’e pa su trayectoria.
Tabata un evento sumamente bunita unda cu tur a bini hunto pa celebra e legado di Francisco “Tico” Kock. E encuentro aki no solamente a trece alegria den curason di tur cu conoce Tico, pero tambe a crea recuerdonan cu lo dura pa semper.
Un di su coleganan musico presente e dia aki tabata e cantante popular Janiro Eisden. El a conta cu e semper e tabatin un aprecio masha grandi pa Tico, cu semper a mantene y conserva e cultura di steelpan. E ta involucra e generacion nobo den e cultura di steelpan y ta hinca e musica di awendia riba steelpan. Pa Janiro ta un honor di por a scucha Tico toca ‘Dios para ‘den’, un exito di Janiro, riba steelpan. Tabata un honor di por a presencia e homenahe bon mereci duna na Tico.
Otro colega musico presente n’e evento tabata Greg Schaarbaai, cu a demostra su amor y aprecio grandi pa Tico. Semper Tico a trata nan tur, no como colega, pero como un miembro mas di su famia.
Jair Boekhoudt, tocado di steelpan ta un di persona cu a siña toca steelpan danki na Tico. El a conta cu un dia Tico a yam’e pa e bin ‘val in’ pa un otro tocado di steelpan, siendo cu e not abata sa nada. Pero Tico a siñ’e y awo e tin mas di 30 aña caba tocando steelpan.
Presente e atardi aki tabata t’ey tambe Ronwayne Kock, cu awendia tambe ta un di esunnan di e generacion nobo cu a siña toca steelpan hunto cu Tico. Nan a biaha hunto na varios ocasion. Y Tico a stim’e como yiu y el a stima Tico como un tata. P’esey ta un honor pa tabata presente e atardi di reconocimento pa Tico Kock.
Hopi di esunnan presente e atardi aki a describi Tico como un hende super alegre, cla pa yuda unda cu e por. Y semper Tico su portanan di cas tabata habri pa nan tur.
Christopher Rodulfo a describi Tico como un persona super alegre, su lema di semper ta “no tin pakico rabia.” Pa describi Tico den un solo palabra : Felicidad.
Roderick Kock tabata stima Tico manera un tata. Semper Tico t’ey pa tur hende, sin preocupa si e conoce e persona of no. Esey ta Tico. Un hende di tur hende.
Ivan Quandus a siña conoce Tico den añanan 1970, tempo cu nan a toca hunto den steelband, Ivan den steelband di Tanki Flip, Young Stars y Tico den steelpan di Paradera, Sunny Isle. Y asina e amistad a cuminsa y cu paso di aña, hopi biaha el a yuda Tico den diferente grupo y esey a fortifica nan amistad.
Yiu di Tico, Rygell cu hopi orguyo a a bisa cu Tico ta practicametne tur cos pa nan. Tur loke nan ta awe, ta danki na Tico. Rygell mes ta toca steelpan mescos cu su tata. Palabra di su tata: “Stima tur hende, el a biba bon cu tur hende semper. Bida ta cortico, stima otro.” E miho conseho cu nan a yega di haya for di nan tata Tico Kock.
