El a pasa henter dia na Dienst Landsrecherche Aruba (DLR). T’e sospechoso principal di e caso Tulipan, ex-Minister Guillfred Besaril di MEP ta tras di tralie. A invit’e p’un te pero manera cu el a yega n’e oficina y bisa “bon dia, m’a yega”, a ancr’un boei na su mannan. Mesora a avisa su abogado defensor, mr. Doris Canwood.
Atardi despues di oranan largo di detencion, a topa cu e abogado na su salida for di DLR. “Awe ta prome dia di verhoor y nos ta bay tin hopi confiansa p’e proximo dianan”, tabata prome palabranan di mr. Doris Canwood. A puntra Canwood si e detencion tabata uno di sorpresa. El a indica cu e no tabata un sorpresa ni p’e y tampoco su cliente. Despues cu a detene e ex-director suplente di Arubahuis, Glenn Ling, ya Besaril a cuminsa prepara mentalmente cu e lo ta e next.
Riba e forma con e detencion a tuma luga, tabata hopi cla cu nan no a invit’e pa bebe un te sino mas bien pa cuminsa e proceso di interogacion y claro pa deten’e tambe. Besaril ta cooperando 100% cu husticia y ta contestando tur pregunta. E tin su berdad y riba esey e ta keda para. Riba e indicacion cu Besaril kier a yega na un deal pa paga bek, Canwood a comenta: “Nos no tin ningun deal, en todo caso no cu fiscal”. E ta deteni pa e proximo dos dianan y djey lo mira si ta necesario pa prolonga pa ocho dia mas. Besaril ta den bon animo, e abogado a termina bisando.
TOCANTE GUILLFRED BESARIL
Guillfred Besaril, kende originalmente ta un Polis, a drenta sindicalismo y desde aña 2013 ta milita riba lista di MEP pa cual el a drenta Parlamento. Den su prome eleccion el a logra 833 voto, den eleccion 2017, su votonan a baha na 508 y den eleccion na juni 2021 a logra 203 voto individual. Diamars dia 21 di september 2021, Conseho di Minister a ratifica su nombramento di dia 20 di november 2017 como Minister Plenipotenciario, staciona na Den Haag, Hulanda. Guillfred Besaril a reemplasa Juan David Yrausquin, cu a tuma e funcion over despues cu Alfonso Boekhoudt a tuma retiro pa bira Gobernador di Aruba.
Tocante Caso Tulipan
E caso aki ta relaciona cu e investigacion grandi cu tin andando riba ex-Minister Plenipotenciario Guillfred Besaril pa uzo indebido di fondonan di pais Aruba. Prome detencion a tuma luga dia 16 di januari, 2024, Glenn Ling (Director suplente di Arubahuis). Caso Tulipan ta dirigi riba iregularidadnan na Arubahuis den e periodo di 2018 pa 2021. Tempo cu Besaril tabata den funcion di minister plenipotenciario di Aruba na Hulanda.
