Directiva di Refineria di Aruba (Rda) a informa prome minister cu e compania interesa den lease di tanki di refineria a hala atras. Durante negociacionnan pa lease e tankinan, RdA a scoge e compania cu miho condicionnan pero nan tambe a keda afecta pa COVID-19 y no por a cumpli.
Den e contract firma tin e parti di periodo pa compania cura di e problema, pero e siman aki esey ta vence. Segun minister president, Evelyn Wever-Croes, si e placa no bin riba mesa, ta consider’e cancela. Esey ta nifica cu RdA por bay cera contract cu un otro compania. E ta reitera cu Gobierno no ta envolvi den e negociacion na ningun manera y p’esey el a hala nan atencion.
E ta tende cosnan sea den prensa of na momento cu oponente Mike de Meza bisa algo, “pasobra e si tin su hendenan cu ta mete constantemente cu maneho di e compania.” Na momento di a tuma nota di esey, el a pidi mas informacion y a haya sa cua tabata e problema. E mandatario a kere cu COVID-19 no lo afecta e desaroyo economico aki, a resulta otro pasobra mundialmente e tin su efectonan.
Awo a drenta den un otro etapa cu un otro compania ta interesa den e tankinan cu ta cla. Segun Wever-Croes, placa a cuminsa drenta y por recupera e otro tankinan cu no ta den bon estado ainda. Nan por haci e tankinan bashi y drecha nan, p’asina bay over na lease nan. Tin un retraso pero e final ta yegando y pronto lo mira un otro desaroyo.
Refineria ta canando e proceso di public tendering, esta request of interest. Tambe a cana dos RIO, cual uno ta pa refineria y e di dos ta pa un otro tipo di desaroyo manera un jachthaven, of un centro tecnologico completo. El a splica cu a propone hopi idea, pero nan ta den combersacion p’e lunanan di september, october y november. E interesadonan cu a bay p’e di dos fase, por bishita diferente area, mira e area di data y por duna un binding offer. Prome no por a haci estudionan necesario, pero awo si y por duna un oferta. El a sigui bisa cu na final di november por tin un bista di cua ta esun di mas serio. E mandatario tabata desea di a haya na final di october, pero despues di e splicacion ricibi cu esaki ta tuma tempo.
Tur compania ta stranhero, pero algun di nan tin representante aki. Ta costa biahenan, investigacionnan, haci calculacionnan prome cu yega na algo. E team di RDA a splica e mandatario cu no kier pura e proceso aki, pasobra por haya algo den pura y con cu ta, pero tambe e por pega. Esey ta algo cu nan no kier. Unabes cu e proceso caba, pasobra gobierno ta sigur di tin un partner p’esaki of un otro desaroyo, pero cu ta trece mesun hopi trabou manera refineria. Esaki no ta solamente pa desaroya San Nicolas, crea cupo di empleo, crea desaroyo economico, pero ta busca pa hiba Aruba dilanti.
