Nos di partido Curpa ta sumamente contento di a haya e bon noticia cu premier Mark Rutte ta para banda di partido Curpa, unda cu no por obliga Aruba di acepta matrimonio di mesun sexo. Tur ora e partidonan politico pa nan convenencia ta gusta sconde tras di Hulanda. Mayoria biaha nan ta haya e bofta bek den nan cara.
Partido Curpa ta e unico partido cu ta para pa e famia ordena pa Dios. Nos lucha a cuminsa for di 8 di september 2016 unda cu a forsa e amienda 7. Despues di a wordo critica pa forma parti di e amienda 7, e lider di mep a gaña e pueblo cristian di no lo permiti esaki. A reuni cu e pastoornan y den un manera masha sutil el a splica cu no tin conseho ainda si ta bay cassatie. Minister di Economia di otro banda den un entrevista a declara cu su partido RAIZ si ta di acuerdo.
E declaracion di premier Hulandes Mark Rutte ta mustra minister Wever-Croes cu no acepta matrimonio di mesun sexo no ta discriminacion ni tampoco por papia di desigualdad. Sentencia di Europese Hof den pasado ta papia bon cla di e asunto aki. No ta bay contra di creencia di un pueblo. Tanto e partidonan MEP, AVP, Accion21, RAIZ y mas ta di acuerdo pa pasa e ley aki. Pa partido Curpa nos generacion ta sagrado y lo para y bringa pa bienestar di nos muchanan inocente. Laga nos muchanan ta mucha y no bin cu enseñansa cu ta stroba nos muchanan desaroyo. Ora nan ta adulto ta nan lo sa kico nan kier haci cu nan bida, pero no ta permiti pa mishi cu nos muchanan. Keda leu for di nos yiunan. Ta nos derecho.
Nos ta kere cu e noticia di premier Rutte a cay den hopi bon tera aki na Aruba. Pueblo di Aruba esaki ta e tempo pa sin miedo lanta ariba y defende nos principionan, normanan y balor. Nos tambe tin derecho di wordo respeta. Nos ta para pa locual cu ta husto. E mensahe aki mester yega na oido di nos parlamentarionan y pa nan tuma e curashi pa bin para banda di partido Curpa. Na e parlamentarionan cu ta bisa di ta cristian, esaki ta e momento pa lanta para y no bin cu e argumento pa hustifica boso mes dilanti di Dios. Dios su palabra ta si y amen. Aruba lo ta bendiciona ora nos ta respeta e leynan di Dios. E leynan di hende cu ta contra leynan di Dios ta trece violencia y miseria.
Partido Curpa ta asina contento cu un politico grandi na Hulanda manera Mark Rutte ta uni su mes na partido Curpa y ta duna nos mas forsa pa sigui lucha como unico partido cu ta para pa e leynan di Dios cu ta nos fundeshi pa garantisa futuro di humanidad. Esaki ta e tempo pa e pueblo Cristian uni cu partido Curpa pa hunto nos para pa e bienestar di e famia original y bienestar di nos isla. Sin miedo. Si Dios ta cu nos ken por ta contra nos.
