Siman pasa diahuebs ya caba SEPPA a reuni cu Minister di Transporte Ursell Arends riba e tema di Arubus. Pa basta luna nan ta luchando riba e tema aki, pero a empeora. Na final di reunion a yega na e acuerdo cu un compania independiente lo duna un conseho riba proceso di structura salarial ofreci pa Arubus.
Magaly Brito, secretario general di SEPPA, a splica cu cos a empeora na Arubus momento cu na december ultimo Arubus N.V., como dunado di trabou, a dicidi di implementa algo sin worry cu tin un acuerdo na mesa. Asina ey tin un discusion cu den e acuerdo, di december 2019, tin tema di implementacion, structura salarial nobo cual mester a drenta na vigor entrante prome di januari 2021. N’e momento ey tabatin discusion.
Minister a convoca un reunion y eynan tabatin un poco bay bin, a tira algun proposicion riba mesa. Segun Brito, na tur momento nan a keda bis’e cualkier compensacion dje periodo di prome januari 2021 te december 2022, e compensacion ey ta discuti riba dje t’e final. Pasobra esaki ta subheto n’e acuerdo cu a yega n’e structura salarial.
Di tin un bon structura salarial y tur hende ta contento cu ne, e ora ey mester simplemente regla e periodo retroactivo. Eynan tin e suma di 750 florin, pero despues a bin un otro 750. Hunto cu esaki cu e discusion na december, di banda di minister a bin cu proposicion pa tene e contracto colectivo vigente pa un aña mas. A informa e mandatario cu na principio no tin problema cu esey, pero pa tene cuenta cu e trahadonan di Arubus a keda hopi aña atras den negociacion pa yega eventualmente na ahustacion di salario. Costo di bida a dal nan tur, pero nan no tabatin oportunidad pa yega na un acuerdo cu e dunado di trabou pa ahustacion di salario.
Esey ta loke a culmina, unda cu e mandatario a yama SEPPA y shop steward pa un reunion. Mirando cu no ta yegando na un acuerdo, e trahadonan a dicidi cu ta bay drenta den accion di protesta. Pa motibo cu esaki a cay riba dia di bishita dje importante, esta Famia Real, esey a haci cu e yamada a drenta. A purba di yega na un acuerdo locual tin of solucion, ya cu segun e minister esaki no tabata prudente. Tin protesta riba caya. Segun Brito, nan no tabatin problema pa sinta y a bin padilanti cu e partidonan, esta gerencia di Arubus y SEPPA, mester a negocia y esey no a pasa.
ACUERDO YEGA
Durante e reunion a discuti riba diferente punto, di cual ambos banda tabatin nan argumentonan. A yega na un acuerdo, caminda lo laga un compania independiente duna un conseho riba structura di salario cu Arubus kier bin cu ne. Pero tambe riba e proceso cu Arubus a hiba pa yega n’e structura aki. Den esaki tanto trahado como sindicato lo haya e oportunidad pa trece nan obhecionnan, kico a sosode, kico no a bay bon y con por cambia esakinan.
Pa mas lesa TREMPAN.COM.
| ReplyForward |
