Director di AUA Airport, Joost Meijs, cu ta procedente for di e aeropuerto di Eindhoven maneha pa e mesun Schiphol Group tabata un di e prome personanan (despues di Gobernador) pa saluda Famia Real na nan yegada na nos isla. Aunke nan tin un agenda yen cu hopi bishita, no por kita cu e prome y ultimo bishita ta na AUA Airport.
E monarca Hulandes a yega di biaha pa Aruba caba pero no por a keda sin expresa con impresiona el a keda ora a tuma nota di construccion y ampliacion andando. Manera ta conoci, e ultimo biaha cu Famia Real a yega Aruba ainda no a cuminsa cu e proyecto Beatrix Gateway 2030 no a cuminsa ainda. Na momento cu keda cla, e aeropuerto di Aruba lo tin mas capacidad pa procesa mas pasahero, mas avion y mas carga. E lo sigui di ta un berdadero orguyo pa Famia Real, pasobra ta e aeropuerto den Reino Hulandes cu ta carga nomber di e mama di nos Rey!
E comunidad di aeropuerto
Na su yegada tabatin un grupo grandi di trahado y otro consecionarionan cu ta forma parti di e “Airport Community” para den fila ta spera e caravana oficial. Ta bon pa menciona cu Aruba Airport Authority ta emplea mas o menos 200 persona den servicio directo. Pero si conta tur compania cu ta traha riba e propiedad di AUA Airport, lo yeg facilmente na 1500 empleado. Un cantidad di nan awe a bisti special den color di Famia Real y cu bandera den man pa yama e famia bonbini.
Nos ta cla p’e reto
E director di AUA Airport a probecha e tiki tempo pa cana banda di SM Rey Willem-Alexander pa lag’e sa cu nan ta trahando hopi duro mes pa kibra tur record e aña aki, den cantidad di pasahero, vuelo, movecion, capacidad di stoel y destinacion. Meta di AUA Airport ta pa por ta un ehempel di exito pa e region.
Pronostico 2023
Ta bon pa menciona cu na aña 2022, turismo di Aruba a recupera cu 96%. Esey ta hopi bon, si compara cu mundo a recupera cu 66%, e continente Americano cu 66% mientras cu Caribe a recupera cu 82%. Pa e aña aki ta anticipa un recuperacion di 105% den comparacion cu aña 2019. Pa por realisa esey, AUA Airport ta percura pa sigui atrae mas aeroliña, aumenta vuelonan existente y purba convence e aerolineanan pa bula cu avion mas grandi y cu mas capacidad di stoel.
Tocante AUA Airport
AUA Airport ta un di e aeropuertonan mas ocupa den region Caribe cu mas di 24 diferente aerolinea operando pa Aruba contribuyendo na mas cu 2.5 miyon pasahero pa aña (prome cu COVID) y cu buelonan pa 26 diferente destinacion rond di mundo. AUA Airport ta opera stabiel cu mas di 95% di su bishitantenan cu ta bin pa vakantie di cual 77% ta for di Merca y Canada, 10% for di Latino America, 8% for di Europa y 4% for di Antia Hulandes te cu fin di 2022.
AUA Airport ta reconoce cu esaki ta danki na e economia stabiel, clima politico, hospitalidad, populacion diversifica y siguridad general di nos isla. AUA Airport ta sigui expande y mehora su facilidadnan pa mantene su posicion como un di e aeropuertonan mas innovado den region.
