E grupo “End Child Abuse” cu ta bay demostra bou di e lema “Ta Basta” tin hopi plan cu e meta pa cambia e forma cu ta atende cu pedofilnan aki na Aruba. Inclusive nan a pensa pa blokia KIA ora cu e guardianan ta bay sali cu un pedofil.
Pero e grupo a haya basta persona cu a cera cabes y a papia di hopi cosnan diferente cu nan ta bay haci pa e forma con ta trata pedofilnan na Aruba. E grupo cu a uni aki a papia caba cu KPA y Corte y a mustra nan cu ta bay manifesta cu e permiso di Yuri Bracho.
A enfatisa cu nan ta un grupo anti-violencia pa cual si tin hendenan cu kier bin haci drama y kibra cos, nan ta bisa cu esaki lo no bay yuda nan logra nan meta.
A splica cu e masa mester uni y pone presion pa haci e cambionan necesario. P’esey ta uzando e plataforma aki pa yega na nan meta. P’esey ta enfatisa cu nan ta un grupo anti-politico y anti-violencia. Ey ta unda e problema a start di hopi aña a pasa sin cu a logra algo. Ta compronde cu tin frustracion, pero awo no ta momento pa bringa otro, pero uni pa e meta na bienestar di muchanan.
Nan a bisa tambe di ta masha contento cu ya caba a cuminsa duna poco resultado basa riba nan movecionnan. Asina por ehempel a scucha cu ta bay adapta “orientatie punten”, ta aumenta castigo y PG nobo ta bini, etc. “Nos ta un grupo cu a lanta den 7 dia,” e vocero Mitch Ho-Asjoe a bisa. Y a agrega cu tur hende ta bon-bini, inclusive mucha.
Na mesun a cuminsa cu recaudacion di firma contra abuso sexual. Nan kier yega sigur na 10 mil firma pa hala atencion. Lo entrega esaki na Parlamento y Gobernador.
E marcha di e grupo aki ta cuminsa dilanti Corte pa 3’or di atardi, unda tin charla riba e tema pero tambe testimonio. Despues ta entrega un carta na Corte y dje Parlamento, unda tambe ta entrega un carta.
