Despues di hopi preparacion y pone talentonan hunto a yega momento pa comparti un produccion conoci /sentimental pa hopi hende pero den un estilo nobo y mas moderno.
“Atardi” ta un cancion clasico di e compositor Rudy Plaate.
E ta un di e canticanan cu grandi y chikito conoce y cu semper cu e zona ta yena nos cu un emocion y orguyo pa tin e honor di ta biba riba nos isla(nan) stima.
Micheal Lampe ta conta, na momento cu Selwyn de Wind (director) a bin cu e proposicion pa haci un version di “Atardi” den mi estilo di elementonan tradicional y moderno como tambe pa haci e sound design y score pa e pelicula di e bida di Rudy Plaate Atardi, mi no a duda y a cuminsa riba dje mesora.”
Pa locual ta trata e version cu a traha, esaki a carga e melodia principal den un parti instrumental cu a “añadi” na e interpretacion. A purba captura y expresa, no cu palabra sino cu emocion, e sentimento cu e melodia y composicion ta yena ami y segun mi hopi di nos cu ne, ta locual Michael a expresa.
A tene e elementonan basico di e cancion cu su guitara y mandolin pa e color original pero tambe a añadi instrumentonan tradicional manera “benta”, tambu, chapi, cuarta, flauta y a combina esaki cu live drums, drums electronico, bass electrico como tambe synthesizer analog cu ta carga y accentua e emotion bou di e ritmonan. Mi ta yama e style “Caribbean New Wave” (Palms Up)
Mirando cu “Atardi” a nace na Corsow, e voz tremendo di Kris Berry ta habri e cancion cu “Atardi Corsow ta bunita” pa despues ZOINX rap un parti nobo cu e la skirbi, inspira pa e cancion y na final Micheal ta drenta cu “Atardi Aruba ta bunita”.
Un honor pa por a haci un reinterpretacion di e clasico aki y comparti vocals cu tremendo talentonan manera Kris Berry & Zoinx como tambe musiconan di talento sin igual manera Marco Dorothea (Mandolin) , Sorandy Jacobs (Flauta, tambu, chapi y mas percussion), Ralph Durgaram (drums) di the Beat Freak Studio.
No por keda sin menciona Selwyn De Wind cu palabra di gradicimento, pa a trece tur e multitalentosonan hunto! Micheal ta spera cu cada un persona di cada isla por disfruta di e reinterpretacion aki y cu “Atardi” por sigui resona pa generacionan nos dilanti. E premiere di e filmacion Atardi lo tuma luga dia 9 juli na Corsow y 10 juli na Aruba.
