Desde 1 di juli 2007, SVb a keda encarga cu e control medico pa sector publico y pa e sectornan cu ta yega na sector publico, esta pa e ambtenaarnan y esnan cu tin un status igual cu e ambtenaarnan pa haci control medico. Den e cuadro ey, SVb ta un consehero di gobierno pa loke ta absentismo den sector publico.
Absentismo den sector publico no ta algo di preocupacion di awo. Pa hopi aña caba e ta algo di preocupacion. E ta un di e motibonan tambe cu na 2007, gobierno a dicidi cu e ta elimina su servicio di BGD (Bedrijfsgezondheid Dienst) y manda e tareanan pa SVb den un intento pa busca un manera pa contene y reduci e abstentismo den sector publico.
Segun director di SVb, Edwin Jacobs, tabata tin hasta e pensamento cu mester a pasa e ambtenaarnan, bao di e mesun seguro cu esnan di sector priva tin. Pero te asina leu no a yega.
Desde cu a tuma e tarea over di BGD, a constata cu e ta un reto grandi. A constata cu no tin un conciencia asina fuerte e tempo ey cu abstentismo ta un comportacion. Absentismo ta un comportacion cu por ta medicalisa. Pero e ta un comportacion. Ta un decision di cada persona pa dicidi cu e ta sinti cu e no por traha. E ora ta e dokter di control tin cu determina si e persona ta incapacita pa su trabao.
Jacobs ta sigui splica cu pa motibo cu e ta un comportacion ta nifica cu bo por maneha esaki. A purba durante tempo di stimula e sector publico pa bay over na maneha absentismo. No solamente limita su mes na administra absentismo. Ora ta administra absentismo, lo por cay den discusion si e ta hopi of e ta poco.
Ora cu ta maneha, ta bay haci uzo di e indicadornan di absentismo. Ta bin cu maneho dirigi pa reduci esakinan.
A conduci cu na 2010 a entrega na gobierno un nota cu a yama “Na caminda pa un absentismo socialmente aceptabel.” Den e nota ey a propone gobierno pa bay over na introduci un webpage of portal pa e servicionan di gobierno, e departamentonan, caminda cu ora nan mes ta percura pa haci e notificacion di AO y nan tin e ora nan tin tur informacion 24 ora pa dia, di e indicadornan di absentismo cu por maneha esaki.
SVb a haci diferente esfuerso riba e tereno aki pa motiva e departamentonan pa bay over na maneha absentismo. Pero ta keda mira cu tin un tendencia di no haci esaki pasobra e no ta facil y e tendencia ta hopi biaha pa manda e trahado pa e dokter, poniendo e dokter den un posicion pa hunga pa polis. Esey no ta e rol cu un dokter tin den e proceso di absentismo.
Hopi trabao di absentisom tin cu haci den e departamento. Hiba combersacion di absentiso. Yega na palabracion. E forma con ta tuma un AO. Tin diferente tarea cu ta parti di e proceso di absentismo, cu departamentonan tin cu ehecuta. Tin departamento cu a pick up esaki bon. Departamentonan cu a haci nan best. Tabata tin un proyecto di prueba hunto cu departamento di recurso humano, caminda a scoge e departamentonan cu tabata tin mas problema cu absentismo, pa bay den un proyecto di guia y mustra con ta un grupo di apoyo pa e departamentonan aki. Esey tambe cierto momento a termina sin mucho exito. Asina ta keda mira di parti di SVb cu masha poco ta wordo haci pa absentismo. Mientras tanto dokternan ta mira 35 pa 40 persona pa dia, cual no ta normal pa un dokter di control tin un presion di trabao asina grandi di parti di trahadonan di gobierno.
E cantidad di hendenan cu ta meld ziek ta mucho mas grandi den gobierno. Esey no ta saludabel. A base di esey, a acerca ministerio di finansas cu e peticion pa por duna un presentacion, e forma di mira e problema di absentismo y pa duna un comparacion cu sector priva.
Na fin di dia no por splica dicon cu nos ta biba riba e mesun isla, pero trahando den un sector publico, ta notifica AO na un forma diferente, compara cu sector priva. Malesa ta dal nos tur priva. E no por dal cierto grupo mas cu otro. Esey a pone cu a haci un presentacion cu a hiba como titulo “Absentismo den sector publico: e necesidad pa yega na un absentismo saludabel.” Eyden SVb a haci su esfuerso pa presenta cifranan pa loke ta e absentismo den sector publico.
