Universidad di Aruba tabata tin un charla diamars anochi, cu varios orador, como tambe un orador via Skype, Jen Ross, kende ta duna les na Universidad di Aruba den facultad di Arte y Ciencia, pa loke ta e programa di trabao social y desaroyo, a splica cu e orador invita Linda Loaiza Lopez via Skype, ta un sobreviviente di violencia di genero for di Venezuela.
Na 2001 el a sufri violencia horibel, sadistico, brutal durante tres luna y mey, for di un persona desconoci. Pero su caso no a bay pa ningun banda pasobra su violado, su torturado tabata conecta politicamente cu circulonan di poder.
Venezuela tabata tin un sistema di husticia cu a faya den e caso di e orador. El a bay busca husticia, pero su abusado no a wordo castiga.
Linda a bay cu tur e curashi. Tabata tin hopi secuelanan fisico. E mester a haci 15 operacion y tambe tabata tin hopi trauma psicologico. Pero el a bay dilanti. El a persevera y a bisa cu e no lo bay acepta esey. E no ta bay acepta e impunidad. El a bay studia derecho y tambe el a hiba su caso te cu corte Interamericano pa Derechonan Humano na Costa Rica, 17 aña despues di loke a pasa.
Husticia internacional ta tarda hopi tempo. Aña pasa el a haya e decision di corte interamericano na su fabor, cual tabata uno historico. E decision ey a bisa cu Venezuela tabata responsabel pa faya den e caso di dje, a faya e acceso di husticia. E estado di Venezuela tabata responsabel pa e tortura mes y e sclavitud y e violencia sexual cu Linda Loaiza a sufri.
Tabata algo cu ta afecta Venezuela sigur, pero cu tambe tin un importancia na nivel mundial. Pasobra e ta un precedente legal. Cualkier pais por bisa pa wak kico a pasa na Venezuela. E decision aki di corte tin importancia pa henter mundo. Pa e victimanan di violencia di genero y esey ta nifica hopi.
Kico nos na Aruba por siña
Hopi cos nos por siña, segun Jen. Tabata tin tres panelista local, cual tabata interpreta kico kiermen pa Aruba y tambe algo cu Linda a resalta y tambe e publico presente a resalta, cu nos mester trece conscientisacion kico ta pasando den e mundo aki. Nos mester ta consciente di e derechonan humano cu tin tur hende di ta respeta. Nos tin ley na Aruba. Nos tin constitucion. Nos tin ley internacional riba nos tambe. Pero nos mester enforsa, na laga keda riba papel. Pero tambe hiba tur esey na un nivel di implementacion. Nos mester wak pa e casonan ta poni. Fundacion hende Muhe den Dificultad a resalta durante e evento, cu tin desde januari 2019, mas caso cu ta yegando pa husticia, pasobra e procurador general a manda enforsa, manda bisa cu nos mester tuma e casonan na serio.
Tambe algo cu Universidad di Aruba y e trahadonan social kier bisa, cu un di e problemanan principal cu Aruba tin riba tema di violencia di genero, ta cu hende ta keda mudo. Hende no ta papia di dje. No kier pa hende sa su problemanan y e no ta bisa ora cu e ta wordo abusa.
Lo principal cu hende mester haci ta halsa su voz y bisa loke ta pasando y hiba su caso pa polis. Lanta un caso legal pasobra si e no lanta, nada no ta bay cambia.
Tambe tabata un punto cu a bin cun’e durante di e anochi, tabata pa crea consciencia, cu ta importante. Pa hende halsa su bos ta importante y haci mas cambio den practica y ley cu nos tin na Aruba. Pueblo henter mester bisa cu ta basta. Mester cambia. Segun panelistanan cu si hendenan no halsa su bos, sociedad no ta mustra cu e ta den desacuerdo cu e situacion actual, e leynan no lo bay cambia. Ta hopi importancia pa crea consciencia y pa hende por tuma un rol mas activo. No simplemente “like” riba Facebook of algo. Pero join e marchanan, halsa bo voz pa haci e cambionan mas real.
