Ta diamars ultimo cu un biaha mas a nota sea directo of indirecto un impasse y falta di union den coalicion. Dos miembro di coalicion sea a yega laat trabou of no a bin mes pa cual a causa cu e presidente di parlamento a hay’e forsa ta pospone e reunion te proximo aviso.
Ta un situacion di berguensa mirando cu den sala bo tin e Minister di Turismo, Dangui Oduber cla pa presenta e presupuesto di Tourism Product Enhancement Fund (TPEF) y sperando aprobacion di parlamento.
Riba su mes t’un fondo cu no sa tin mucho polemica riba dje y mayoria biaha, ta sosten’e unanimamente.
E parlamentarionan sa bon cu band’i turismo, no tin espacio pa mucho wega di politica.
Pero pa prome biaha a haci wega cu ne si, por lo menos e lider di Fraccion di RAIZ a keda sin presenta na trabou pa cual a laga e minister mustra mahos memey di tur su conseheronan.
Ta un mensahe RAIZ ta mandando pa MEP? Por lo menos tata di Minister Dangui Oduber, alabes ex-Prome Minister di Pais Aruba na cuater ocasion, a publica riba su pagina di Facebook: “Den wega nan politico nada ta sosode pa casualidad, pero haci cu casualidad cu un meta. Un sistema di hunga cu lo bo ta importante!”, asina Nel Oduber a publica riba su pagina social despues cu RAIZ a manca MEP y laga nan minister mustra malo.
Claro, Nel Oduber si ta compronde e mensahe cu RAIZ a manda pa MEP y aki ta trata pa su propio yiu kende awendia tin e honor di ta goberna den e propio oficina den edificio bieu di Bestuurskantoor caminda Nel Oduber a sinta tempo e tabata na cabes di gobernacion.
A probecha pa puntra Edgard Vrolijk kico e ta pensa di e mensahe di Nel, pa cual Vrolijk, cu masha honestidad a contesta cu e no a tuma nota di e mensahe y cu e no ta interesa den tipo di cosnan asina tampoco. Ta un contesta masha fuerte cu un propio miembro y parlamentario di MEP ta vocifera den direccion di e propio Lider Honorario di su partido.
Tocante e reunion cancela pa falta di quorum, Vrolijk ta di opinion cu cada ken mester haci nan trabou. El a cumpli cu su parti pa yama e reunion pero pa falt’i sosten entre otro di MEP mes y RAIZ, e reunion no por a sigui. Aunke cu Vrolijk ta lamenta cu oposicion ta haci politikeria cu casonan asina, pasobra nan tabata t’ey masha bon pero a scoge pa keda pafo di sala y asina secuestra e reunion pa falt’i quorum.
