Naturalesa su regalo pa nos planeta ta e miyones di especienan cu nos conoce y stima, y tambe tur esnan cu ainda nos no a descubri. Desafortunadamente, sernan humano a trece un desequilibrio den naturalesa y e consecuencia ta cu nos mundo actualmente ta experenciando e grado di extincion di mas grandi desde cu dinosaurio a desaparece mas cu 60 miyon aña pasa. Contrario na e dinosaurionan e extincion actual ta un resultado directo di actividad humano.
Esaki ta directamente liga na cambio di clima, perdida di habitat, deforestacion, agricultura no sostenible, polucion y pesticida. E impacto ta masha grandi.
Si nos no actua awor, e legado mas grandi di ser humano lo ta extincion di naturalesa y bida riba nos planeta.
Flora y fauna tin un valor esencial y tin un rol unico y compleho den nos bida. Nos mester traha hunto pa protehe especienan den peliger di extincion manera coral, rifnan, olifanti, giraffe, insecto, bayena, abeha, etc.
E bon noticia ta cu nos por haci un diferencia y trata di evita cu e especienan aki disaparece.
Nos mester educa nos mes y trece conocimento na otronan y splica e forma rapido cu extincion ta tumando lugar y compronde kiko ta e consecuencianan cu esaki por trece pa henter mundo.
Lions Club International tin como 1 di su 5 proyectonan mundial nos medio ambiente. Mundialmente nos kier concientiza e importancia di un balansa sano den nos naturalesa. Nos kier proteha y restaura nos medio ambiente na un manera sostenible pa asina mejora e bienestar di poblacion mundial.
Sea conciente y proteha flora y fauna di nos dushi Aruba. Abo por haci e diferencia…!!!
