Awe a cuminsa cu e campaña di e Siman di Lantamento di Mucha, cu lo dura te cu dia 25 di november. Esaki ta un campaña cu un siman cu ta celebra e hecho, cu dia 20 di november ta Dia Internacional di Derecho di Mucha.
Segun minister Glenbert Croes, tur hende sa cu desde cu e gobierno aki a sinta, nan a keda marca pa sucesonan tragico cu alabes a bira e bandera di trabao di e gobierno, di tur stakeholder di e sector y sin duda di e departamentonan cu tin e encargo, cu hunto cu e stakeholdernan, traha riba e plan con ta bay sigura cu tur mucha na Aruba por ta lanta den un ambiente di siguridad, cu amor y cariño, di nan pa cu otro, pero tambe hunto den e proteccion of e capa importante di nan hogar.
Un di e tareanan grandi cu a bin ta haciendo ta cu ta esaki ta di tres biaha cu ta celebra e siman di Lantamento di Mucha, unda cu a bin un interlandelijke taskforce, unda cu tur pais den reino lo mester a desaroya nan vision pedagogico. Tin un comision Vision Pedagogico cu ta encarga cu e desaroyo di e vision aki. Ta entre otro Tienda di Educacion, Fundacion Respetami, Fundacion Pa Nos Muchanan, Stichting Wit Gele Kruis, Departamento di Asuntonan Social.
Pero hunto cu nan tin un plataforma grandi di diferente otro stakeholdernan cu ta apoya nan. Sin duda e minister ta haci un reconocimento na Sociaal Crisisplan (SCP), e apoyo cu e Comision Vision Pedagogico Aruba ta haya for di SCP. Pa e mandatario ta importante cu el a tuma encargo di e proceso aki na nivel ministerial, pa por apoya con ta sigura pa nos muchanan lanta den un ambiente di siguridad, cu amor y cariño, fortifica e mision pa nan, pa haci nan bida miho.
Mester fortifica e labor di nan mayornan. Pesey mes ta contento cu durante e siman di Lantamento di Mucha aki, cu ta bay tin cursonan ta tumando luga na Centro di Hoben y Famia, con pa apoya e trabao di di e mision cu e mayornan mester tin den bida di lanta nan yiunan. E mandatario ta haci un reconocimento no solamente na tur esnan cu ta traha den e comision Vision Pedagogico, tur gremio, tur e stakeholdernan cu ta forma parti di e Plataforma cu ta apoya nan trabao. Ta haci un reconocimento tambe na tur e trahadonan profesional cu ta traha dia aden y dia afo pa haci bida di cada mucha miho.
Tayernan
Lo bay tin diferente tayer durante di e siman aki, cuminsando dia 17 di november, esta mañan, cu e Tayer “E Tata Ehemplar”, cu lo tuma luga na Centro pa Hoben y Famia. Dia 18 di november lo bay tin e apertura virtual di Centro pa Hoben y Famia pa 9’or di mainta. Dia 19 di november, lo bay tin e tayer “Un Famia Saludabel” di 7’or y 9’or di anochi na Centro pa Hoben y Famia. Dia 20 di november, Lo tin un sesion virtual di Codigo di Proteccion pa 10’or di mainta, riba Dia Internacional di Mucha. Lo tin tambe donacion di peluche di parti di Quota Club, cu lo tuma luga na Centro pa Hoben y Famia pa 2’or di merdia. Y di 2’or pa 5’or di atardi, lo bay tin un Debate Virtual My New World.
Dia 21 di november lo bay tin UNICEF Kinderrechten Filmfestival Finale, cu lo ta na TeleAruba di 3’or pa 4’or y mey di atardi y despues na Drive-Inn lo bay tin e final di Pasa Pret cu Rotaract, pa 6’or y mey di atrdi.Despues, dia 23 di november, lo bay tin bishita di e focusgroep My New World na Bestuurskantoor di 3’or pa 5’or di atardi, dia 24 di november di cinco edicion Ditigale Koninkrijk Opvoedconferentie professionals, di 8’or y mey di mainta pa 1’or di merdia y finalmente dia 25 di november, lo bay tin e 5 edicion Digitale Koninkrijk Opvoeconferentie Professionals 8’or y mey di mainta pa 1’or di merdia.
