Pa di tres aña consecutivo, Banco Central di Aruba (BCA) lo tene e “Encuesta di Corupcion” cuminsando dia 16 di november 2020. E encuesta digital aki ta inclui, entre otro, preguntanan relata na e nivel di corupcion, e experiencia cu corupcion na momento di haci uzo di servicionan particularmente den e sector publico y e necesidad pa medidanan adicional pa combati corupcion.
Frena corupcion ta un prioridad halto pa BCA, pasobra corupcion tin consecuencianan negativo economico y social. Varios oganisacion internacional, manera Tranparency International, ta ehecuta encuestanan riba e nivel di corupcion na diferente pais. Como cu Aruba no ta forma parti di e encuestanan internacional aki y cu pa e motibo ey data importante di corupcion no ta disponibel, BCA ta conduci e encuesta di corupcion desde 2018.
Nos ta consciente cu e informacion aki ta sensitivo y pa e motibo aki ta enfatisa cu e encuesta ta totalmente anonimo y ta garantisa cu lo trata tur informacion obteni confidencialmente y uza nan solamente riba un base agrega pa metanan estadistico y analitico. Pa motibo di e pandemia actual di Covid-19, lo haci e encuesta aki online. Nos ta invita tur residente di Aruba riba 18 aña di edad pa participa den e encuesta importante aki door di yena e cuestionario online. Esaki ta accesibel riba nos website www.cbaruba.org.
E rapport CORRUPTION SURVEY 2019 ta disponibel riba e website di BCA (https://www.cbaruba.org/cba/manageDocument.do?dispatch=view&id=5317).
Tocante Banco Central di Aruba
E proposito principal di Banco Central di Aruba (BCA) ta pa contribui na stabilidad financiero y prosperidad economico di comunidad di Aruba. BCA ta logra e mision aki door di implementa un maneho monetario efectivo dirigi na mantene stabilidad di balor di e florin, promove e solides y integridad di e sistema financiero, y yuda mantene un sistema di pago eficiente y confiabel.
Banda di su tareanan nucleo, BCA ta encarga cu emision di biyete di florin y moneda di florin, y ta e bankero di gobierno. Ademas e ta regula e transaccionnan di pago cu exterior y ta administra e divisanan di Aruba y ta controla e uzo di esaki.
Pa mas informacion tocante Banco Central di Aruba, por bishita e website www.cbaruba.org
