Aruba Table Tennis Association ta organisa e Copa Betico Croes 2018 tanto den Centro Deportivo Betico Croes y Club Estrella na Sta Cruz.Diamars 23 di januari lo cuminsa cu e categoria Master y Damas na Club Estrella esaki ya for di 7or di anochi.
Su siguiente siman dia 29 di januari lo hunga den e categoria U – 11 y U – 15 cual lo cuminsa pa 5or di atardi esaki tambe na Club Estrella. Pa su majan 30 di januari lohunga den e categoria B klas y Open esaki na Centro Deportivo Betico Croes cuminsando pa 8or di anochi. Lo finalisa e Copa Betico Croes den tenis di mesa dia 31 di januari, cu e categoria U18 esaki na na Club Estrella cual orario lo ta 6.30 di atardi. E entrega di premio lo sigui despues di e final di e torneo. Ta bon pa recorda cu den su tempo, sr. Betico Croes awe den felis memoria a praktica e deporte di tenis di mesa, hasta den su temporada como studiante na Hulanda. Un bez bek na Aruba, Betico Croes a continua cu e deporte di tennis di mesa na Club Estrella.
E deporte di tennis di mesa a conoce un gran temporada 2017 unda a hunga varios torneo local como tambe internacional. E atletanan hoben Mathilda y ChingHo Chung a debuta den torneonan grandi manera e Suramericano Hubenil, Panamericano y e clasificacion Olimpico Hubenil. Es mas e atleta ChingHo a keda escohi como atleta di aña di Aruba den su categoria cual ta un logro grandi. Asina tin mas atleta ta den bon desaroyo cu por hunga na nivel competitivo. Mas cu claro tur esaki ta danki na e bon trabou di e federacion, e staf tecnico, e mayornan y e atletanan cu ta traha cu dedicacion na bienestar di nan deporte.
Un danki sigur na Lotto, e Loteria di Aruba pa medio di Stichting SportsubsidieAruba cu a subsidia e eventonan deportivo en conexion cu e celebracion riba Dia di Betico. Tur aña mayoria federacion tin riba nan calendario un evento deportivo rond di e fecha di 25 di januari, celebrando asina e fecha natal di e gran estadistica Arubano.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
