Tin un producto nobo cu a subi mercado den e area turistico. Segun Camilo Salazar, project manager di e-vikes, Power Bike Bird, ta trata di un e-scooter (electrical scooters) cu ta hopi popuar na Merca y tambe den mas di 100 pais caba.
Na Aruba e ta relativamente nobo, mirando cu el a cuminsa un siman pasa den Beta-phase. Awo, nan ta cla pa cuminsa completamente, core full rond den e area di Eagle y Palm Beach na Aruba. Awor aki nan ta consisti di mas of menos 100 unidad.
Ta bezig riba un app system, unda cu turistanan por huur e e-scooter, simplemente cu nan telefon, conexion di wifi y bluetooth. E turista ta haya un di e unidadnan. Ta trahando pa tin luganan designa, sea na hotel, restaurant, na plazanan y cu celular nan ta download e aplicacion, pasa scan e bar-code di e aparato y djey pa $1.05 nan por huur e e-scooter.
Pa cada minuut cu nan core, ta cobra nan $0.50. E idea pa laga e aparato un caminda nan ta staciona na cierto camindanan, naturalmente pa no tin problema den ni sector priva, ni den sector publico.
Ta trahando riba dje pa haci’e den netsites, pa laga nan staciona, unda cu nan lo haya riba nan aplicacion unda esakinan ta keda.
Tracking
Awor aki nan ta track nan 24/7 aunke cu nan ta trahando actualmente riba un sistema operativo, unda e mashinnan ta cende 8’or di mainta te cu 11’or di anochi. Despues di esey por waknan staciona, pero no por uza nan.
Reaccion
A cuminsa cu 20 unidad den Beta Phase. A testnan y a haya numbernan basta bon. Ta hopi contento cu e resultadonan te awo. Despues di diasabra, momento cu nan a cuminsa cu henter e flota riba caya, ta mira e resultado final pa ta positivo.
Restriccion
Tur e-vikes ta traha riba un sistema di GPS y tambe Userblock. No ta permiti pa subi caminda grandi cu nan. Si un hende purba di subi caminda grandi, e aparato lo blokia su mes y dal paga.
Nan por yega core full e fietspad di Linear Park. Una bes cu nan pasa 5 meter for di e Linear Park e ta dal paga. E ta duna nan un aviso cu ta yegando e limite di dje y e lo paga. Si e persona bira y bay bek den e green zone di e uzo, e por haci’e.
Seguro
Tur ekipo ta sigura. E ekiponan tin un seguro grandi cu Nagico. Tambe e persona, ora e firma e digital waver, downloading e app, ta acepta e riesgonan cu e mes haci ora e haci un daño.
Local y turista
Local y turista por uza e e-bike. Tur loke bo mester tin ta bo cel, un cuenta di credit card cu bo celular y bo por uz’e.
Tempo di bateria
E tempo di bateria 100%, ta di un uzo continuo di 2 ora. Door cu e ta trata aki di un micro mobility vehicle, e aparato ta djis pa move di un luga pa otro, specialmente pa hendenan di edad.
Autoridad
Ya caba nan tin e permisonan apropia, e seguro apropia. A acerca loke ta Strandpolitie pa duna nan un introduccion na e producto y tambe na e uzo y e camindanan cu tin pensa di pone. Ainda ta trahando riba algun caminda mas pa butanan staciona. Ta haciendo tur loke mester ta pasobra kier keda bon cu tur hende.
Aprobacion di minister
Minister Dangui Oduber tambe a haya un presentacion pa loke ta e-vikes, un atraccion pa turista y kisas local tambe. E ta comenta cu ta algo hopi positivo. El a wordo invita door di e inversionistanan cu a bin cu e proyecto di e-vikes.
Ta un metodo di transporte cu ta wordo hopi uza na Merca, na Europa. A comenta por ehempel na Merca tin 100 miyon di e e-vikesnan aki caba den circulacion. Ora cu biaha bay afo ta mira esaki tur caminda. E ta algo innovativo y ecofriendly.
Sigur e ta un metodo di transporte hopi facil pa e turistanan y sigur ta apoya proyecto asina. Si mira den henter e area, na momento cu un turista kier bay beach, si nan keda den un condominium tin cu cana bay beach. Cu e metodo di transporte aki ta yega den henter e zona di highrise na un manera hopi facil cu e metodo di transporte aki hopi moderno y util pa tur e turistanan.
Ta un avance y noticia hopi positivo pa e bishitantenan cu ta bin Aruba. Aki ta mustra cu Aruba ta innova y cu ta bayendo den direccion cu mundo ta bayendo.
E mandatario ta contento cu e grupo di inversionista hoben a bin cu un proyecto asina cu ta bira un servicio adicional y un atraccion pa turista y tambe localnan. Nan tambe por haci uzo di e servicio aki, por medio di un app, cual por download.
Esaki sigur no lo bira un competencia den ningun sentido pa transporte publico, pasobra e ta un area hopi limita cu nan por core y nan a comenta tambe cu si sali for di e area designa, automaticamente e e-bike ta shutdown. No por sali for di e area asigna, cu ta mas bien cu ta e area di zona hotelero cual ta high y low rise.
E compania ta bezig cu regulacionnan hunto cu DOW pa wak si por expande e area un tiki mas. Nan ta bay core riba acera. E no ta bira un transporte cu bo ta bay core riba caminda den areanan publico, sino mas bien riba acera. Caminda cu tin boardwalk y Linear Park, lo bay haya tipo di bikenan aki cu ta bay core riba e camindanan aki.
