Diadomingo 9 di februari 2020, MEP ta celebra su 49 aña di existencia. 49 aña di lucha y sacrificio, 49 aña na defensa di e pueblo Arubano, pero tambe 49 aña di logronan historico pa pais Aruba.
Tabata riba un diamars 9 di februari 1971 cu nos lider inmortal Betico Croes a funda e prestigioso partido Movimiento Electoral di Pueblo (MEP). Desde principio caba partido MEP a pone su dilanti e ideologia social-democrata, nos structura estatal y union di henter e pueblo Arubano, sin distincion di rasa, color, religion, status social etc.
E prome directiva di MEP
E decisionnan tuma riba dia 9 di februari 1971 a ser ratifica durante e promer Congreso di MEP cu a tuma lugar dia 14 di februari 1971 den teatro Rialto na Playa. Durante e congreso aki, dirigentenan di e partido UNA (Union Nacional Arubano) tambe tabata presente y nan a dicidi di uni nan mes na e partido recien funda MEP.
E promer directiva di MEP tabata consisti di lider y presidente Betico Croes y e miembronan Efraim de Kort, Daniel Leo, Jossy Croes, Sixto Feliciano, Watty Vos y Cezare Terzano.
E personanan presente di parti di UNA tabata Frans Figaroa, Dodo Figaroa, Poy Werleman y Tommy Leest.
MEP ta wordo considera como un partido prestigioso. Un partido cu desde su fundacion a keda un partido grandi y esaki durante 49 aña largo, ya cu MEP despues di su promer salida cu 7 asiento nunca den e eleccionnan siguiente a yega di baha bao di 7 asiento. Den henter Reino Hulandes no tin un partido politico cu un trayectorio asina impresionante!
Tres lider grandi
MEP ta un partido cu desde su fundacion te cu awor apenas a conoce tres lider, esta Betico Croes (dfm), Nelson Oduber y nos actual lider Evelyn Wever-Croes. MEP ta un partido di cual despues di morto di Betico Croes a wordo bisa “Betico dood, MEP dood”. Sinembargo durante e añanan cu a sigui MEP a crece den un forma grandioso, estableciendo recordnan impresionante durante e eleccionnan na 2001 y 2005. Pa yega na un trayectorio impresionante asina ta evidente cu e partido mester a haci hopi cos bon pa e comunidad aki.
Un lucha tenaz
Riba e tereno estatal nos partido tabatin problemanan serio cu e sistema politico di e structura di Antias Hulandes ya cu Aruba tabata den minoria compara cu e isla mas grandi, esta Corsou. Despues di su promer salida exitoso na 1971 Betico Croes, otro miembronan di partido y e militancia a pasa den temponan masha duro mes na unda nan mester a hiba un lucha tenaz contra esnan cu semper a pone trampanan den caminda pa nos no logra nos libertad, esta nos Status Aparte. Danki na su carisma, perseverancia y determinacion combina cu e respaldo incondicional di su pueblo, Betico Croes y MEP a logra pone e politiconan Antiano y Hulandes y hasta su opositornan local respeta deseo di pueblo. Hecho ta cu ta MEP ta e partido cu a percura pa nos Himno y Bandera, nos propio Gobierno, Parlamento, Gobernador, Banco Central, propio moneda, ortografia etc.
Logro di Status Aparte na 1986
Fuera di e Referendum na maart 1977, e accionnan di augustus 1977 tabata determinante den e lucha pa Status Aparte y ta danki na e accionnan aki Aruba a wordo scucha door di Hulanda. Finalmente e deseo di Aruba a wordo cumpli durante e Conferencia di Mesa Rondo na maart 1983 na unda nos derecho di autodeterminacion a ser reconoci y aproba pa nos sali for di Antias dia 1 di januari 1986 y cu nos lo bira independiente dia 1 di januari 1996 den un Man Comunidad cu Hulanda. E fecha di Independencia a wordo impone riba Aruba pa por a sali for di Antias. E tempo ey Betico Croes a bisa bon cla cu MEP lo acepta por lo pronto e condicion aki, pero cu nos lo bolbe.
Y ta cu honor dia 13 di juli 1990 ex-Minister President Nelson Oduber a percura pa scrap e fecha di Independencia 1996 for di den Statuut, pero manteniendo e derecho pa bira independiente dia cu e pueblo aki den un referendum dicidi esaki den su mayoria cu aprobacion di 2/3 parti di Parlamento, cual ta un garantia solido y responsabel.
Den un siguiente articulo partido MEP lo elabora riba algun di e gran cantidad di logronan cu MEP a ehecuta durante su 49 añanan di existencia.
