Tin un situacion caminda cu un automobilista a kibra su auto riba algun piedra riba Jaburibari. E luga ta hopi conoci y ta hopi transita. Indira Varis a conta su preocupacion cual ta e barancanan cu por causa cu un hende por causa desgracia.
E ta sigui splica cu den oranan di marduga, durante cu e ta bay train, el a sinti cu su auto tabata tin algo los bao di dje y a purba di hala banda di caminda.
Na momento cu el a purba di hala na banda, no tabata tin mucho visibilidad. Dado momento el a dal riba un baranca cu e bisiñanan a dicidi di pone, menos di 5 meter leu for di caminda. Mientras cu den clausula di vivienda ta bisa cu e cura mester ta cinco leu for di caminda, te unda cu e sa.
Si nan a cambi’e pa menos cu esey, Varis no ta na altura. Pero esey ta poni den ley te cu dia di awe. El a dicidi pa warda y mainta tempran a yama DOW. DOW a bisa cu nan no a pone e barancanan. E lo mester a tuma contacto cu Forensys y cu polis.
Na momento cu a tuma contacto cu polis, na prome instante polis no a worry cu Varis. Nan a haci chercha di dje. Sinembargo Forensys si a bin, a saca nan potretnan y documenta esakinan.
Despues di un rato Varis a bolbe yama warda di polis y aki a dicidi di manda patruya na cas di Varis pa mira e situacion, garantisand’e cu nan lo bay wak kico a pasa.
Parti atardi Varis a bay na e luga y acerca na e habitantenan di cas. E ultimo aki a hari’e manera cos cu no ta nan asunto. Den un otro palabra, nan no ta bay haci nan mes responsabel pa un baranca cu nan a pone canto di caminda. El a puntra varios bisiña si nan sa si ta DOW por a pone e barancanan of si ta e bisiña a haci esaki.
Nan a contesta cu na momento cu a traha e cura, nan a pone e barancanan aki. Auto di Varis a haya hopi daño bao di dje. Varis a pensa cu por ta e prome pa denuncia esaki. E no sa si tin mas hende cu lo a pasa den esaki y a keda keto.
E ta haya cu a yega e momento pa papia. E cosnan aki ta imposibel. Si Varis haya un flattire, e mester tin e caminda cu e por kita for di dje y drecha su tire. Si algo pasa su auto, e mester por kita for di caminda y traha riba su auto.
E ta imposibel pasobra cu e habitantenan a dicidi cu nan cura ta eynan, a dicidi pone piedra pa ningun hende no yega na nan cura.
Forensys
Forensys a bisa Varis cu sea e mes mester paga e dañonan of cuminsa cu un caso civil, cual pa e manera cu el a purba di acerca e hendenan y papia cu nan, hasta a menasa pa dal’e, e ta duda cu esey lo bay ta posibel.
Varis kier pa autoridad tuma un decision kico lo pasa cu e barancanan aki. Di e manera aki el a recuri na prensa pa asina e haci denuncia di e situacion.
Si DOW kita e piedranan, e por scapa bida di un hende. Ta bon mes e no tin un rasca riba su curpa. Pero dia di mañan, por ta un mayor cu su yiu den su auto, e yiu a haya golpi. Ken ta bay para responsabel pa esey.
E banda di medaya
Ruman homber di doño di cas a acerca nos despues di e entrevista cu Indira Varis. El a splica cu den pasado a pasa varios accidente. Pa e motibo ey a pone e barcananan. Nan a haya e tempo ey ok di DOW pa pone barancanan pa proteha nan mes di autonan cu sa baha caminda.
Den varios ocasion autonan a hera drenta den cas, autonan a hera mata hende cu tabata sosega bao di palo y tabata peligroso
E autonan ta core riba e camidna aki riba velocidad halto y a haci esaki pa proteha nan mes. E cabayero ta lamenta cu e dama a bin cu un actitud hopi fresco y arogante y pesey nan no kier deal cun’e.
E ta compronde cu e situacion ta fastioso berdad pa e dama, pero tin cu wak di nan banda tambe y cu tur cos ta na ordo.
E ta spera cu prensa y pueblo por compronde pakico a pone e barancanan y cu e ta na ordo cu DOW. Fuera di esey e barancana ntin mas cu 60 aña poni eynan, segun ruman di e doño di cas.
