SVb ta sacando multanan administrativo pa incumplimento, di parti di e dunado di trabao. Director di SVb, Edwin Jacobs a splica cu manera cu a informa comunidad den luna di November y December, a saca e prome tek di notificacion pa dunado di trabao, cu tin intension pa bay impone multa.
E dunado di trabao tabata tin tres siman pa a duna su banda di medaya. Tin cu bisa cu a haya di diferente dunado di trabao, nan punto di bista riba e caso.
Eseynan tin pendiente ainda pa bay studia e contestanan aki. Esnan cu no a haya contesta, a bay over na manda e boet mes. Tin cu bisa cu na comienso di aña a ricibi e prome pago caba di e boet. E dunado di trabao tin seis siman pa cumpli cu e pago aki.
Mientras tanto na comienso di Januari a sali un otro tek di notificacion pa dunadonan di trabao. Asina aki, durante e luna aki lo bay sali mas notificacion pa e dunadonan di trabao.
Ta haci un apelacion na tur dunado di trabao, cu SVb tin e servicio pa registra digital. No ta bay depende mas si e trahado ta yega na tempo na SVb eynan of no. Ta evita tur e problema eynan, door di registra y inscribi digitalmente bo trahadonan.
SVb lo bay ta huramentando tambe dia 28 proximo, ocho empleado mas di BOA. Asina por fortifica nan presencia riba caya.
Den luna di Februari lo bay cuminsa cu hopi control pafo di oranan di trabao, pa percura pa e ley di seguro di malesa y accidente wordo cubri cabalmente, manera ley ta bisa.
Pago
Door cu ta e prome biahanan y no bin un reaccion, ta impone e ora e suma di 500 florin pa cada trahado cu bo no a inscribi.
Tabata tin un empresa cu tabata tin dos trahado cu no a inscribi na tempo, Jacobs ta conta.
Inscripcion
E responsabilidad ta sinta semper cerca e dunado di trabao. Si abo como dunado di trabao, duna e papel pa e bay inscribi, bo mester pidi’e bek. E tin cu trece e comprobante bek pa e dunado di trabao.
A dun’e mainta 8’or, 12’or di merdia ta puntr’e unda e comprobante ta, por ehempel. No por bisa cu a dun’e, pero e no a bay. Si duna e trahado e ordo ey, e tin cu bay SVb bay inscribi y pa 12’or e trece e comprobante pa e dunado di trabao.
Ta evita yen di problema si kier usa e sistema tradicional. Pero si kier usa e sistema digital, tin un siman prome caba por hink’e den e sistema. E dia ey bo tin te cu 1 minuut prome cu 12’or di anochi, pa por hinca e trahado den e sistema.
En principio no tin motibo pa un dunado di trabao haya boet. Si e haya boet, ta pa motibo di negligencia.
Tur tipo di trahado
Tur trahado cu ta cay den structura cu su trabao ta depende di e empresa cu e ta traha. Sea cu ta part time of no. Pa cualkier tipo di duda, por tuma contacto cu SVb. Si ta duda den algo, contact departamento di Premie Heffing y haci bo pregunta. Miho bo puntra pa bo sa si bo tin cu haci’e, cu SVb constata cu bo no a haci’e y haya multa.
E multa
Den un siguiente buelta, si e dunado di trabao no cumpli, e boet ta subi. Cada biaha cu e no cumpli cu su obligacion, e tarifa ta bira mas halto. Pero Jacobs tin e pleno confiansa cu e dunadonan di trabao lo bay ta cumpliendo cabalmente cu e ley di seguro di malesa y accidente.
Ta bon pa menciona, cu un trahado segun e leynan di seguro di malesa y accidente, no mester ta legal na Aruba. No ta pasobra bo tin un trahado ilegal, ta bisa cu no ta sigur’e.
E ora bo ta haya problema cu Dimas, pero esey ta e riesgo cu bo ta tuma, ora bo ta tuma servicio cerca un persona cu no tin permiso di estadia legal of permiso pa traha legalmente na Aruba.
Controlnan lo sigui
Controlnan lo bay sigui, segun Jacobs. SVb lo bay ta fortificando nan relacion cu Dimas tambe. Pasobra, manera cu a menciona aña pasa, a yega na un acuerdo y ta trahando duro hunto cu e departamento di Impuesto, pa percura pa tur hende cumpli y den e cuadro ey, e tin cu bira un triangulo entre Departamento di Impuesto, Dimas y SVb.
