Famia Planea por mira bek cu 2018 tabatin diferente reto. Pero mirando e logronan Famia Planea ta contento di mira cu esakinan ta surpasa e retonan.
Evelyn Ras Yarzagaray, directora di Famia Planea, ta yama danki na e clientelanan, pashentnan, tur stakeholder cu ta traha cu nan. E aña aki Famia Planea ta bay cumpli 48 aña y cuminsando for di dokternan di cas, AZV, scolnan cu ta traha cu nan di cerca, scolnan basico, secundario, avansa, special. Nan a logra e meta cu nan a pone inicialmente na comienso di aña. Nan ta contento cu faltando e ultimo kwartal di aña a surpasa esaki y a logra nan meta pa 2018.
Naturalmente esey no ta nifica cu mester para keto, pasobra nan tin hopi plan y proyecto grandi den ‘pipeline’ pa 2019 y 2020. Famia Planea ta traha cu un pa e 5 añanan cu ta bin. Esaki ta plannan strategico cu nan kier alcansa, un potencial hopi mas grandi p’e hobennan na Aruba, el a bisa. Tambe un sosten p’e mayornan y tambe e clientenan cu nan ta provee servicio y producto.
Ta mira visiblemente e crecemento di Famia Planea den su clientela, pero tambe e aspecto cu nan ta mira e educacion sexual na scol. E sexuele voorlichting pero tambe un fenomeno cu ta creciendo e aña aki ta e sesion di 1 a 1. Esaki ta un servicio cu nan ta brinda na e scolnan cu ta desea esaki. Famia Planea ta haci un consulta na e scol, unda ta sinta cu esnan cu tin e necesidad di haya consulta riba e area di salud sexual reproductivo of tambe riba cierto producto cu nan ta brinda. Esaki a crece enormemente hunto cu proyectonan di scol cu Famia Planea ta haciendo pa añanan.
A ripara cu e scolnan ta birando hopi mas open pa papia riba e tema salud sexual reproductivo. Hopi di nan kier haci algo pa cu esaki, unda cu nan ta purba di brinda mas informacion na e alumno, e hoben cuminsando na un edad mas jong. Tur esaki ta riba e area preventivo. Hopi biaha no por midi, pero Famia Planea ta contento cu e movecion aki cu e manera di mira con por yuda brinda mas informacion y giua na e alumno. Famia Planea a trahando cu hopi mas stakeholder y tin hopi mas proyecto grandi. Esaki ta proyectonan riba nivel nacional cu nan lo bay implementa y introduci na 2019.
A haci ahuste
Transcurso di 2018 nan a haci ahuste y un di e ahustenan mas grandi tabata despues di 47 aña, unda cu a cera e oficina di San Nicolas. Famia Planea tabatin 2 oficina, cual 1 tabata na San Nicolas y e principal ta na Oranjestad. Famia Planea a nace na San Nicolas, pero segun e añanan a pasa a mira un shift den clientela. Esaki a trece cun’e cu mester a bay concentra unda cu tabatin mas peticion cu esaki. Na aña 2005 a habri un sucursal na Playa y na 2009 a haci esaki un tiki mas grandi y Playa a bira e oficina principal.
A mantene e oficina na San Nicolas, pero den e ultimo 2 aña Famia Planea a cuminsa evalua y a mira financieramente kico ta miho strategia cu por a haci y implementa. A mira con pa brinda e comunidad di San Nicolas miho pero tamb otro districtonan na Aruba. Den luna di juni nan a cera e oficina na San Nicolas, pero na augustus a intoduci un servicio nobo y no a propaganda esaki. A haci un soft launching via facebook cu tin servicio di entrega.
Awor e clientela tin e opcion di haci “online shopping” di Famia Planea. Ta bay riba e website di Famia Planea unda cu tin un online store y pa por cumpra eyriba e persona mester ta miembro. Esnan cu no ta miembro por cumpra productonan los y asina por cumpra unda cu ta. Famia Planea ta entrega e productonan cumpra di dialuna pa diahuebs den oranan di atardi, sea cu e persona ta na trabou of na cas y kier haci e uzo di e servicio aki. Tin hende cu ora di nan break ta pasa busca nan productonan y hopi ta haciendo bon uzo di e servicio aki. Esaki ta pa nan yega mas cerca na comunidad. E no ta solamente pa reemplasa e oficina di San Nicolas cu a cera na juni, pero tambe pa amplia nan servicio den otro districtonan. Nan ta yega na esnan cu pa un motibo no tin un transporte pa yega na Famia Planea.
