Diabierna mainta, nos team di redaccion a bay bishita e bario di Moko net patras di ex Baloon Pop Club, na unda tin un caminda di santo y bo lo topa bo mes cu un dump ilegal. Kisas bo ta puntra bo mes pa kico nos ta haci e tipo di coberturanan aki, na unda cu tin biaha hasta nos siguidornan mes ta manda nos potret, video y basta informacion riba dumpnan ilegal pa nos bay wak y comparti esaki cu pueblo. E ta nos intencion pa expone esaki pa promove un Aruba mas limpi, y pa via di nos plataforma 24ora.com, Bureau City Inspector ta sigui tur informe anto ta actua di biaha.
Ta pa e motibo aki nos ta raporta e variedad di desperdicio cu a keda laga atras na un dump ilegal, un otro mas cu a bini acera e biaha aki den area di Moko.
Nos a pasa bishita tambe e area di Parkietenbos, na unda net contra di e muraya di dump tambe a bira un dump ilegal, banda di e cura di dump mes. E ta increibel con algun hende por haci esaki, yega na dump y simplemente benta nan sushi tras di lomba di cura di dump. Nos ta haciendo un cobertura di tur dump ilegal y ta pidi comunidad si abo sa unda tin uno den bo bario, of na unda bo por a wak uno, tuma contacto cu nos redaccion na 583 2424.
