Nationaal stilstaan bij corona ta titulo di un expo (na Noord-Brabant) cu a habri pa publico diabierna na Hulanda. Rey Willem Alexander tabata presente pa realisa e apertura den cual a participa potret y storia di 44 persona cu di un manera of otro a sinti e pandemia di Covid-19 (corona) di cerca. Aruba sigur tin dos storia presenta den e expo aki. Arien Rasmijn a conta e storia di Sharina Henriquez (periodista) deteni den ehecucion di su trabou. Esey tabata e storia di Aruba. Pero indirectamente Aruba tabatin un storia mas den persona di Ingrid. Whitfield, kende tabata presente como e storia di Sint Eustatius.
Hunto cu cada potret, tin un audio cu ta conta e storia di e persona fotografia. Ingrid Whitfield ta un di e su participantenan. Mientras cu su yiu Makeba Mitchel ta conta e storia, awa ta yena wowo di Ingrid recordando “e regalo di Pasco” cu el a ricibi ora cu na december, 2021, el a biaha pa un bishita na Hulanda, pa pasa e fiesta di Pasco cu famia.
“Mi mama Ingrid a mira morto ora cu el a test positivo pa covid-19 despues cu el a yega Hulanda na december, 2021, pa celebra Pasco. Un regalo di Pasco cu no a spera,” Makeba a conta.
Makeba ta biba na St. Eustatius, mescos cu su mama Ingrid, y a haya invitacion pa biaha pa Hulanda pa e celebracion special aki.
“Mi mama a bira malo ya cu e Covid a yega su pulmon y el a keda cinco (5) siman den coma,” Makeba a conta 24ora.com, kende tabata presente na e ceremonia aki.
Mester a bora un buraco na garganta pa e hala rosea. Su recuperacion despues a dura masha hopi. “Mi tabatin mester di hopi fisioterapia,” e mes a conta, recordando cu awa na wowo, e tempo dificil cu el a pasa aden, y toch gradici cu el a keda na bida. “Mi mama mester a siña cana y papia di nobo,” e yiu ta recorda.
Pa relato amplio lesa TREMPAN.
