Un scandal formal a tuma luga den parkinglot band’i Citgo Palm Beach na momento cu a surgi un discucion riba blokiamento di salida di dicho parkinglot. Dos persona deteni y un victima a resulta malamente herida.
Esaki a sosode aproximadamente 10:30 pm na Noord, na e banda di parkeo caminda e truck di cuminda ta ubica. Un chauffeur a blokia e pasada di tal forma cu tabata stroba demas auto di sali. E tabata pidiendo cuminda na e truck, segun por a compronde.
Un otro chauffeur a reverse, cu intencion pa sali di e parkinglot pero no por a haci esey debi cu e salida tabata blokia. A cuminsa un pitamento, zundramento cu a escala y a bira un discucion formal entre e dos chauffeurnan.
‘Wrong and strong’. E persona no kier a hala su vehiculo y ademas a dicidi di yama un familiar pa bin yud’e. Situacion a bay completamente for di man na momento cu nan a pasa na agredi e chauffeur cu tabata bandonando sitio.
Ademas cu e mester a wanta insulto, el a hay’e ta wanta golpi tambe. El a resulta herida cu sla na cabes. Polis y ambulance a presenta pa atende cu e victima y e dos agresornan.
Despues di tuma datos, informacion di tur testigo a detene e dos agresornan y transporta nan pa warda di polis.
