Ay Nobe! ta locual nos por a scucha durante e edicion infantil y hubenil di Festival di Dande, un festival cu pa dos aña consecutivo ta tuma luga di un forma virtual. E ta un tradicion di fin di aña, pa ricibi bishita na cas, cu un ritmo unico y letranan cantando y expresando bon deseo pa e aña nobo. Sigur, un orguyo pa mira con mucha- y hobennan ta tuma rienda di nos cultura.
E festival, cu a dura por lo menos seis ora, a conta cu un total di 27 participante y 6 agrupacion. Tur participante a ricibi un medaya, regalo y tambe un certificado como recuerdo di nan participacion.
Na final di e anochi a cera conoci cu e artistanan;
Categoria 4 pa 6 aña:
3: 4260 punto – Ian Tromp
2: 4465 punto – Qu-Lainey Jansen
1: 4525 punto – J-vyôn Besselink
Categoria 7 pa 9 aña:
3: 3875 punto- Moses McCollum
2: 4325 punto – Akyrah Margarita
1: 4415 punto – Jaymerson Kelly
Propio composicion: John-Maynard Wever
Categoria 10 pa 12 aña:
3: 4710 punto – Lizienne Webb
2: 4800 punto- Georvin Angela
1: 4810 punto – Stephanie Quandt
Categoria 13 pa 17 aña:
3: 4670 punto – Reanne Ras
2: 4743 punto – Caylee Pieters
1: 5075 punto – Jorienne Angela
Minister di Finansa y Cultura mr. Xiomara Maduro tabata encarga pa corona cada ganado. E mandatario a felicita cada participante y a desea nan un bon cambio di aña.
Dande
E ta un tradicion pa aña nobo cu grupo di Dande ta pasa di cas pa cas pa canta dande y expresa deseo pa e famia, conoci y amigo nan por habri un aña nobo yena di paz, felicidad y prosperidad, cu “Ay Nobe”. E coro ta ripiti e refrein Ay Nobe (Aña nobo) den un melodia alegre. E instrumentonan musical cu ta uza ta cuarta, guitara, acordeon of viool, wiri y tambu. Como aprecio cada persona cu e grupo di Dande canta ta tira placa den e sombre di e cantado di Dande. Antes tabata un florin of placa larga. Sinembargo awendia ta tira placa di papel, bou un creencia supersticioso di suerte, cu mas bo duna, mas bo lo haya bek den e aña nobo.
Dande ta un sorto di serenata dedica na cada miembro di famia cu e miho deseonan pa e aña nobo. Ademas Dande ta e musica mas representativo y simbolico di musica local, di mesun manera cu calypso ta pa Trinidad y reggae ta pa Jamaica, cu pa medio di su musica ta refleha e balor etnico di e pueblo. Dande tambe tin un ritmo Africano, mescos cu tumba of e tambu di Corsou. Algun districto tin awor varios grupo di Dande. Te cu Tres Rey e gruponan di Dande ta pasa di cas pa cas pa canta nan cantica tradicional. Desde 1971 ta organisa cada aña un festival di dande pa eligi e rey of reina di Dande. Tambe tin un festival di dande pa mucha y hoben pa mantene e tradicion di Dande bibo.
