Autoridad na aeropuerto a hera stroba dos pasahero di subi avion diahuebs merdia. Nan tabata bayendo Barranquilla. Net algun minuut prome cu a cuminsa aborda, e personal di Douane cu cacho, polis na aeropuerto y tambe dos miembro di Marechaussee a yega cerca.
Eynan a bay atende cu un di e pasaheronan y despues e otro tambe sinta su dilanti. Parce ambos no tabata bayendo hunto pero conoce otro. A hibanan bou vigilancia pa asina controla ambos riba loke tin sospecho riba nan. Ta prohibi di sali cu un suma mas halto cu 10 mil dollar sin declara.
Si pasa Duana y declara e suma, no tin problema. Esaki ta un regla internacional cu mayoria pais ta usando tanto na salida como na entrada. Den e caso specifico aki a haci pregunta riba placa y demas preguntanan rutinario di autoridad na aeropuerto. E cacho parce a reacciona. Un di nan ta biba na Barranquilla. E otro sa bula cu mas frecuencia pa Aruba. Finalmente despues di e control, nan por a sigui nan biahe.
