E aña aki comision vision pedagogico ta organisando Siman di lantamento di mucha pa di cinco biaha. E organisacionnan cu ta forma parti di e comision ta: Departamento di Asuntonan Social, Centro pa Hoben y Famia, Stichting Wit Gele Kruis, Tienda di Educacion, Fundacion Pa Nos Muchanan y Fundacion Respeta Mi. Cada organisacion a scoge un bario y un punto basico di vision pedagogico pa asina haci un actividad.
Fundacion Respeta Mi a scoge punto basico number uno cu ta lanta bo yiu den un ambiente safe y amoroso. Pa esaki ta organisa e actividad ‘Back 2 the future’ y cu lo tuma luga diadomingo awo, 13 di november 2022, na Museo Cas Tan Tin situa na Pos Abou 19.
E actividad ta cuminsa pa 1:00 pm te cu 5:00pm. Ta bay tin tour den e museo, pero tambe contamento di storia, booth di informacion, arts and crafs y dino jump pa e muchanan. Alabes e cushina lo ta bon surti.
Fundacion Respeta Mi ta invita comunidad henter pa bin pasa un rato agradabel diadomingo awo na Cas Tan Tin. Entrada ta completamente gratis.
