Riba Dia Internacional di Hende Muhe, Prome Minister mr. Evelyn Wever – Croes a atende un conferencia organisa pa Lindy Croes y Julisa Hoevertsz, titula “Ladies Leading Conference: Embrace Equity”. E evento a tuma luga den ballroom di Hyatt Place Airport Hotel. Un cantidad di hende muhe a atende na e evento, specialmente riba nan dia.
E sala tabata yena cu hopi entusiasmo di parti esnan presente y a comparti hopi informacion positivo. Prome Minister Wever – Croes a gradici e dos damanan dinamico cu a organisa e conferencia aki. Semper e ta bon pa hende muhe inspira nos mes y regarda e energia pa por sigui cu trabounan.
Finalisando Prome Minister a bisa: ‘Aruba tin hende muhenan fuerte, lanta door di generacion di hende muhenan fuerte cu a traha duro pa hende muhe ta unda nos ta awe. Awo nos mester carga e responsabilidad aki pa sigui crea oportunidadnan pa hende muhenan den futuro tambe por sigui logra cosnan grandi pa Aruba. Pabien na organisadornan cu e exitoso conferencia aki!’
