Durante pandemia Gobierno di Aruba a introduci e Loonsubsidieregeling pa brinda apoyo financiero na dunadonan di trabao pa por sigui paga un parti di e salario di empleado y asina yuda mantene cupo di trabao mas hopi posibel. Esaki tawata importante pa suavisa e caida drastico di nos economia y mantene e consumo di trahadonan y benta di companianan.
Dunadonan di trabao a ricibi e subsidio salarial den forma di un voorschot den e periodo di 1 mei 2020 pa 31 october 2021. E pago di e voorschot a wordo hasi door di SVb a base di e perdida di benta di por lo menos 25% indica door di e mesun companianan. A otorga un total di 423 miyon florin na subsidio salarial pa cubri te un maximo di 60% di e salario di e empleado.
Na 2021 a determina oficialmente e perdida di benta a base di aangifte di BBO entrega. SVb a determina a base di e informacion oficial aki e suma definitivo di loonsubsidie. A conclui cu a otorga 145,5 miyon florin di mas na dunadonan di trabao mientras negoshinan a ricibi 18,2 miyon florin di menos. Pa tur luna cu a ricibi loonsubsidie, dunadonan di trabao a ricibi un “toekenningsbesluit”. Si dunadonan di trabao no tawata di acuerdo cu esaki, por a entrega bezwaar y eventualmente bay den beroep.
Banda di otorga e loonsubsidie, SVb ta e instancia responsabel pa recobra e suma otorga di mas na loonsubsidie. Na final di 2021 dunadonan di trabao, na ken a otorga loonsubsidie di mas, a ricibi un carta cu informacion di e loonsubsidieregeling y tambe di e “invorderingsproces”, e proceso pa debolbe e suma ricibi di mas. Tambe a pidi dunadonan di trabao pa debolbe e suma ricibi di mas bek of cera un areglo di pago. Na maart 2022 a manda un recordatorio di pago, sigui pa un aanmaning. Desde april 2022 e proceso di recobra e suma ricibi di mas na loonsubsidie a cuminsa.
Recientemente Ministerio di Asuntonan Economico, Comunicacion y Desaroyo Sostenibel a ricibi di SVb e relato di loonsubsidieregeling 2022. Den 2021/2022 a declara un suma di 13 miyon florin na bezwaar hustifica y corte a duna dunadonan di trabao rason den otorgamento di loonsubsidie na un balor di 6,5 miyon florin. Den proceso di tratamento tin un cantidad di bezwaar cu un balor di 29,1 miyon florin y corte tin cu duna su veredicto ainda riba otorgamento di loonsubsidie cu un balor di 700 mil florin. Na final tin un suma di 96,2 miyon florin paga di mas na loonsubsidie pendiente cu por exigi di inmediato door di SVb. Di e suma aki, SVb a ricibi 39,6 miyon florin. Pa loke ta trata e suma di 18, 2 miyon florin cu dunadonan di trabao a ricibi di menos, SVb a paga 13,2 miyon florin caba na dunadonan di trabao.
E relato di loonsubsidie 2022 ta demostra cu sector priva ta cumpli pa debolbe e suma ricibi di mas pero tambe a haci uzo di nan derecho den caso a ricibi di menos. Esaki ta mustra cu e ehecucion di e loonsubsidieregeling tawata un instrumento esencial durante pandemia pa combati e impacto negativo riba nos economia di Aruba, segun Minister Geoffrey Wever.
