Despues cu Billy Piternella, e artista di tattoo, a dicidi di apela un condena di Corte di Prome Instancia, di forma sorpresivo den corte, e mes a dicidi di hala atras. Te hasta e tabata asinaconvenci pa su caso, cu el a pidi pa Hof scucha dos testigo.
Den prome instancia a hay’e culpabel y a dun’e un castigo di seis luna pa violacion sexual, maltrato severo y menasa contra su amante. Esaki cometi varios biaha riba un periodo di mas o menos seis luna, for di memey di aña 2021 pa januari di aña 2022. Den e maltrato a haci uzo di un slang di wasmashin y brass knuckles.
Presidente di Hof a puntra e acusado e motibo pakico el a apela e decision di prome instancia. El a conta su storia bisando cu a manipula e interogacion. El a conta con nan no a skirbi tur cos manera cu el a bisa y na ultimo no a puntr’e si e tin algo mas di bisa. Esaki ta un pregunta cu mester haci semper, segun e acusado. “E recherchenan a skirbi solamente loke cu nan tabata kier y a laga otro cosnan afo”, Billy Piternella a comenta. Su conclusion ta cu un funcionario policial, prima di su amante M.K., ta esun cu ta tras di e manipulacion aki. Incluyendo un amigo di dje cu ta polis a bis’e “nunca bo lo bay gana”.
Despues di esey a repasa e declaracion con a yega na deten’e. Esaki tabata, segun hues asplica, ta riba un yamada di mama di su amante, kende hunto cu mas hende, a mira con e muher K tabata tembla di miedo y tabata mustra di ta den panico cu e acusado aki lo por bay hacie algo (kap’e manera el a menas’e). Tambe nan a bisa cu e tabata yama e señora M.K. tras di otro, door cu e no tabata contesta. Ta parce cu K. a bisa cu e tin miedo pasobra e mester raporta cada 15 minuut na Piternella y si e no haci esey, e lo haya castigo, manera a sosode den pasado caba.
E acusado a admiti cu el a bay na e cas, pero door cu el a informa K. cu e relacion a caba, el a bay busca un television cu el a presta nan pa e muchanan hunga wega riba dje. Pero no a haya ningun hende na cas y el a bay for di e sitio. Despues di yamada a bay busca Piternella. Den e auto a haya un brass knuckles. “Esey ta algo cu semper mi tin den mi auto. Mi ta colecciona e tipo di cosnan ey. Nunca mi a uz’e”, el a bisa diamars mainta na hues. A mustr’e riba declaracion di e victima kende a bisa cu el a maltrat’e cu esey. Su contesta tabata “a uze durante sex pero suavemente.” Mescos el a bisa tambe di un airgun. Segun e acusado e no a dal e tras di cabes di e muhe. Pero K. tabata drumi riba cama lomba p’e y a bis’e “papi bin riba cama.” El a cuminsa lembe su lomba y ora cu el a yega tras di garganta, e muhe a haya hopi ril y su cabes a dal den e airgun cu e tabatin den su man ainda.
A repasa e maltratonan tambe unda cu a resalta e caso di “fisting”. El a hinca su mokete completo den e parti intimo atras di K. y a causa un sangramento formal cu mester a hib’e hospital, cu ayudo di e casa di Piternella. A repasa e declaracionnan duna unda cu e señora K.,
a bisa cu e no tabata kier esaki. E otro señalnan di maltrato ta e mordinan na diferente parti di su curpa. “Esaki tabata riba peticion di mi amiga mes mi tabata hacie y e tabata insisti pa morde mas duro”, e acusado a comenta. A mustr’e cu el a choca e muhe te cu el a bula un djente, uzo di zweep, tatuahe riba curpa cu su nomber y mas.
E mes ta bisa cu e no tabata gusta e cosnan aki pero tabata hacie pa cumpli cu fantasia di su pareha. Sinembargo den corte e mes a declara di a puntra e amante pa haci cosnan manera cu ta aparece den Fifty Shades of Grey. Mientras cu e ta bisa cu tur e cosnan aki tabata loke M.K. tabata kier, pero a haya potret di tur marca y maltrato den su celular. Procurador General a saca un map oraño cu varios di e potretnan aki cu ta e marcanan di maltrato y incluyendo tatuahe cu su nomber na e parti intimo. Ta parce cu e potretnan aki a afecta e acusado, cu a pidi si e por papia cu su abogado. Na dos ocasion a para e caso pa e papia cu su abogado, pasobra el a bisa cu e kier para e apelacion.
Aunke cu el a splica hues cu e potretnan a lag’e kibra, hues a splic’e cu si e para e caso, e prome decision ta keda na vigor y e no por nada otro cu sinta e castigo di seis aña.
Hues a bisa cu e mes a bisa cu e no a haci e cosnan ey, pues e no ta acepta e condena di Corte di Prome Instancia y toch no kier sigui cu e apelacion. A pospone e caso pa un poco mas cu un ora pa e pensa bon prome cu e tuma e decision final. Despues di pauze el a pidi hof pa bisa algun palabra. “Mi ta acepta mi culpa. Mi sa cu loke mi a haci no ta bon. Sorry cu mi a kita tempo di boso.” Como Hof no tabatin nada di atende, a dicidi cu e castigo ta keda igual y ta bira irevocabel. Loke cu a straña hopi hende ta cu e map cu potret ta den e dossier. E pregunta si ta berdad esaki tabata prome biaha cu el a wak tur e potretnan hunto. Riba esaki e no a bisa nada. Solamente cu e potretnan a impact’e hopi.
