Pa prome biaha organisacion Women empOwering Women a organisa un fundraising, esta e 5K Fun Walk and Run “Walk the Talk.” E obhetivo tabata pa cada participante cana p’e motibo cu nan ta desea, sea ta cana pa nan mes, cana pa un famia, cana pa salud, cana pa sostene un organisacion, pa cada participante cana pa locual nan kier para p’e.
Cu e fundraising aki organisacion WOW a logra recauda AWG. 2.500,- pa Centro Famia di Criansa Arubano y Fundacion Guia Mi. A base di un encuesta entre e miembronan di e organisacion, a scoge e organisacionnan aki cu sin duda mester di e sosten.
Centro Famia di Criansa Arubano ta e unico instancia na Aruba actualmente cu ta atende cu locual ta cuido di criansa. Nan ta guia famia/persona(nan) cu ta desea di ta famia di criansa pa mucha cu temporalmente no por biba na cas mas, di e manera aki e mucha ta haya un oportunidad pa desaroya su mes y florece. Como parti di e preparacion, e famia tin cu completa diferente curso cu ta cubri informacion practico y extenso tocante aspecto di cuido.
Fundacion Guia Mi ta un instancia di custodia y di custodia familiar. Nan meta ta pa proteha e mucha cu mester guia manteniendo e interes di e menor di edad central. Nan ta enfoca riba casonan di custodia y casonan di ponemento bou di supervision ora hues ta aspira pa pone e menor di edad na cas atrobe.
Ex-oresident Rocío Burgos a haci e donacion na directora Anneke Nicolaas. Anneke Nicolaas a splica e importancia di e dos instancianan aki pa mucha por crece den un ambiente safe pa su desaroyo. Nan ta enfatisa cu nan ta acepta boluntario pa asina yuda cu e demanda actual, pa mas informacion por bishita nan social media: Facebook.com/CFCAAUA.
Organisacion Women empOwering Women kier extende palabra di gradicimento na tur sponsor y sostenedo cu a kere den e evento aki yudando nos recauda un bunita suma pa donacion. Pa mas informacion of contact por bishita nos social media.
