Aunke cu parlamento no tin un dia cla ainda ki dia pa trat’e, pero ta yegando pocopoco mas cerca pa e introduccion di BBO na frontera.
Un di e partidonan mas preocupa cu e introduccion aki ta e comerciante. Como nan representante, nan tin diferente asociacion cu nan ta afilia na dje, entre otro ATIA, AHATA, Camara di Comercio y Comerciante Uni Aruba(CUA). Por lo menos un di nan, esta Comerciante Uni Aruba (CUA) ta horea habri pa su miembronan y ta “pone cos lora.”
Frans Ponson ta presidente di CUA. E ta un organisacion cu a cuminsa chikito y cu pocopoco ta creciendo. Ta importante pa trece informacion corecto na su miembronan y esey ta netamente locual nan ta haciendo tambe. CUA a organisa un atardi informativo pa tur su miembronan, pero c’un cantidad limita cu por a participa. Den un tempo record, a canta “sold out”, esaki ta debi na e sala di reunion cu a uza, cual ta den edificio di DIMP na Camacuri.
E atardi informativo organisa pa CUA tabata mas bien pa trece informacion corecto y na nan turno, comerciante trece nan preocupacion y pregunta dilanti. Tabatin presente director di DIMP y Aduana pa contesta tur pregunta. Durante un entrevista cu representante di Headlines Group, kende ta e cas editorial di 24ora.com y TREMPAN, Ponson a conta cu e no tabata un encuentro pa debati si e ley ta bon of no sino con por aclaria preocupacionnan cu e comerciantenan tin. E meta final; ta miho informa. Esaki ta importante mirando cu no ta pa tur comerciante tin deduccion, tin si y tin no. Pues pa evita un aumento di prijs innecesario, tabata importante pa trece e informacion corecto cerca e comerciantenan. Si tin un aumento di prijs innecesario, ta tur hende lo biba cu e inflacion.
Comerciante Uni Aruba a trece informacion dilanti cu ta mas practico. No tanto formula sino con lo haci den bida real. Tanto director di DIMP como di Aduana a contesta tur e preguntanan cu e comerciantenan a haci. Adicional e atardi a conta tambe cu un presentacion di un fiscalista kende tambe a duna di su banda pa e comerciante compronde e materia mucho mas miho.
E atardi a bay den bon ambiente, a purba pa e interaccion no bira mucho un discusion sino pa e keda informativo. Durante e encuentro a bin bon pregunta dilanti cu na dado momento DIMP mes a remarca cu; lo bay bek den nan seno pa wak si ta necesario pa trece adaptacion of no.
Ponson a comenta tambe cu antes e mes tabata mucho mas preocupa y danki na tipo di eventonan asina por mira cu no solamente e, pero tambe e comerciantenan ta miho informa y mas importante, menos preocupa.
