E compania cu ta maneha Aeropuerto Internacional Reina Beatrix (AUA Airport), esta Aruba Airport Authority N.V. (AAA), ta orguyoso di por comparti e schedule aereo pa e temporada di winter. AUA Airport su partner Delta Air Lines lo reinicia su servicio for di Boston pa Aruba cuminsando for di dia 18 di december 2021 te cu 3 di mei 2022, riba diamars, diahuebs, diasabra y diadomingo. Lo opera e schedule aki di 4 bes pa siman cu un avion 738, cu ta contene un total di 157 asiento.
E schedule completo di Delta pa e temporada di winter lo ta como lo siguiente: Lo tin buelonan diario for di Atlanta pa Aruba, New York (JFK) pa Aruba y di Boston pa Aruba. E temporada di winter lo cuminsa oficialmente desde 31 di october 2021. Un otro noticia positivo ta cu Canada a habri su frontera pa biahenan internacional. E tres aerolinea Canades a anuncia nan plan cu double seats for di Toronto pa Aruba pa e temporada di winter.
E fechanan cu lo reinicia for di Canada pa Aruba pa e temporada di winter lo ta como lo siguiente:
- Sunwing lo cuminsa bula pa Aruba un bes pa siman desde 6 di september 2021 y lo subi na tres bes pa siman pa e temporada di winter
- Air Canada lo cuminsa cu buelonan dos bes pa siman desde 3 di october 2021 y lo subi na cuater bes pa siman pa e temporada di winter
- WestJet lo cuminsa bula dos bes pa siman desde 6 di november 2021 y lo subi na cuater bes pa siman pa e temporada di winter
Entre januari, februari y maart 2022, AUA Airport lo tin 11 buelo nonstop, compara cu seis buelo pa siman na 2019, for di Toronto, Canada.
E ultimo schedulenan aki ta e bon noticia cu AUA Airport a spera pe: “Nos ta sumamente contento pa mira un crecemento asina positivo den nos trafico aereo. Aerolineanan ta mira demanda den e mercadonan principal y ta sigui adapta nan schedule pa asina por carga e demanda. Esaki ta duna nos pais y mercado mas capacidad. Nos ta afortuna pa ta considera un di e destinacionnan cu ta lidera e mercado y nos ta tuma e realidad aki hopi na serio. Nos ta premira un temporada di winter hopi druk, cu un portfolio di diferente buelo pa y for di Aruba”, asina Jo-Anne Meaux-Arends, Air Service Development Manager di Aruba Airport Authority N.V. a bisa.
Pa e ultimo schedule di buelonan, por bishita www.airportaruba.com y click riba Flight Schedules.
Tocante AUA Airport
AUA Airport ta un di e aeropuertonan mas ocupa den region Caribe cu 19 diferente aerolinea operando pa Aruba contribuyendo na mas cu 2.5 miyon pasahero pa aña (prome cu COVID) y cu buelonan pa 20 diferente destinacion rond di mundo. AUA Airport ta opera stabiel cu mas di 95% di su bishitantenan cu ta bin pa vakantie di cual 83% ta for di Merca y Canada, 6% for di Latino Americano, 8% for di Europa y 3% for di Antia Hulandes te cu Maart 2021.
AUA Airport ta reconoce cu esaki ta danki na e economia stabil, clima politico, hospitalidad, populacion diversifica y siguridad general di nos isla. AUA Airport ta sigui expande y mehora su facilidadnan pa mantene su posicion como un di e aeropuertonan mas innovado den region.
Pa mas informacion tocante AUA Airport, por bishita WWW.AIRPORTARUBA.COM y tambe sigui AUA Airport via social media riba Twitter.com/Aruba_Airport, Facebook.com/ArubaAirport, Insagram.com/ArubaAirport y LinkedIn.com/ArubaAirport.
