Criollo Reds na 2021 a cumpli 20 aña di existencia, pa cual a pidi vergunning pa organisa Copa Santa Cruz, Liga 40.
Robert Koolman, fundador di Criollo Reds, a splica cu nan a pidi pa organisa Liga 40 y Liga 50, como tambe Liga 60. E torneo mester a tuma luga caba for di januari, pero door di e situacion (di pandemia) esaki no a bay door. Door cu nan no a haya vergunning, esaki a haci cu nan mester a warda. Pero e dia a yega porfin, unda cu tin un total di dies (10) team participando, cu lo hunga nuebe wega, den nuebe siman. Tur team lo topa cu otro. E ultimo siman, ta reserv’e pa e final, cual ta dia 3 di oktober.
TORNEO
E torneo aki lo ta un torneo mescos cu tur otro, unda cu lo tin un campeon, subcampeon y MVP. Na final tur lo haya nan trofeo grandi.
E teamnan participando ta:
– Criollo Reds
– Legends
– Surprise
– Black Hawk
– Macuarima
– Quisqueya
– Survival
– Piratas
– Kibaima
– Leftovers
HISTORIA
Robert Koolman a funda Criollo Reds na 2001. Koolman mes for di 1992 tabata tin su mesun team, Cempro, cual compania no ta existi. Despues a cambia nomber pa Boolchands. Ora esaki tambe a stop di existi, e no ta lanta niun team mas. Pero na 2001, nan a cuminsa train riba veld di Olimpic, situa na Maria Maai.
Tur diamas, diaranson y diahuebs tabata tin 20 hende tabata train, nan tabata bay exBoton Rumshop. Eynan a bin cu e idea pa lanta un team, cu despues cu varios di nan a keda kibra cabes, a bin cu e nomber Red, for di cual a pone Criollo dilanti di dje, pa hacie Criollo Reds. Asina e team a lanta y te dia di awe, Criollo Reds ainda ta existi.
FINAL
E final lo tuma luga dia 3 di october, riba Veld di Olimpic. Robert Koolman ta extende un invitacion pa un y tur pa bin apoya e teamnan cu ta participa den Copa Santa Cruz y bin pasa un rato agradabel ariba veld.