Tur aña un cantidad di turtuga grandi, conoci como e Leatherback Sea turtles / Driekiel ta scoge Aruba pa bin pone nan webonan. E aña aki a spera mas neishi compara cu aña pasa, unda a conta mas of menos 40 neishi na Eagle Beach so. Awe merdia, na momento cu hopi local y turista tabata disfruta di nos lama y solo cayente na altura di Costa Linda Beach Resort, ata un neishi a habri y turtuganan chikito a sali y tuma direccion di lama.
Tabata un espectaculo di naturalesa cu tur hende lo kier experencia por lo menos un biaha den nan bida. E ta duna nos un sentido di orguyo con na Aruba nos a custuma y a haci e driekielnan aki como parti di nos naturalesa y custumber di tur aña cu nan ta scoge nos beachnan bunita y cristalino pa bin traha neishi, pone webonan den dje y spera cu den 60 dia e turtuganan ta nace y drenta lama bek pa sigui cu nan bida liber den naturalesa.
Ta importante pa comunidad coopera den esaki tambe. Luznan artificial ta stroba e driekielnan ora di pone webo, pues ta importante pa no cende luz di auto riba nan na beach, of flashlight, etc. Mester duna nan e espacio necesario pa por coba nan mesun neishi, pone webonan y laga nan bay trankil bek pa lama. Ora e turtuganan nace mesun cos, mester sigura cu no tin luz riba nan pasobra nan semper lo sigui e luz y e ora por bay e direccion robes, subi caminda y auto ta pasa trapa nan.
Den caso cu nota un driekiel subi tera, ta bon pa informa polis y nan ta yama Fundacion Turtugaaruba mesora pa duna un man. Boluntarionan di e fundacion conoce e procedura y ta percura pa henter e proceso di ponemento di webo y e nacemento di e turtuganan bay “como debe ser”.
E temporada di pone webo ta termina e luna aki, esta juli. Pues ainda den e siguiente simannan por tin neishinan cu a yega nan 60 dia y cu lo ta cla pa turtuganan nace y sali pa lama.
