Sinta banda di su casa den Corte, Paul Croes a mira e pantaya grandi di television unda e por a sigui, for di sala di Corte, loke e huesnan di Hof tabatin di puntra of splica. E regie-zitting di Hof, como preparacion pa e tratamento profundo di e caso, a tuma luga via di video-call. Defensa y acusadonan na Aruba y e Huesnan hunto cu Griffier na Corsou.
Ta trata aki di caso IBiS, riba corupcion y soborno cu a tuma luga tempo cu e principal acusado Paul Croes tabata minister di labor den Gabinete Mike Eman II.
E sesion aki a tuma menos di un ora durante cual Procurador General a reacciona riba e peticion di defensa di Paul Croes pa scucha testigo, un abogado y un funcionario di e seccion di isolacion. PG a bisa di no mira sentido pa scucha e testigonan aki, ademas cu e no sa si e abogado lo bay di acuerdo pa wordo scucha como testigo.
Acusacionnan contra Paul Croes, Melony Paesch, Ninosca Nunez; Rutmilla Yvone Martinus; Robbio di Vecchia y Jairo Wever a keda mescos.
Defensa a bisa cu nan lo mester di casi cinco ora, hunto, mientras cu PG a bisa cu e mester entre tres pa cuatro ora pa presenta su rekisitorio.
Na final Hof a dicidi cu dia 23 di februari e lo anuncia su decision riba e testigonan y pa defensa cuminsa prepara nan caso pa tratamento den luna di september.
Caso IBiS su investigacion y tratamento den corte tin 4 aña andando y a yega corte na februari, 2019. Un total di 23 persona mester a presenta pa diferente acusacion. Riba 28 di februari tabatin sentencia, unda a condena ex minister Paul Croes. Hues, cu tabata uno di Corsou, e tempo ey a bisa Croes cu e castigo ta tene cuenta cu su situacion personal y su famia. E ex minister tabata cera 80 dia y cual hues ta considera como un castigo fuerte. Fiscal a opta pa cana e caminda di beperking pa no stroba e investigacion. Hues ta tene esey tambe na consideracion.
Hues a bis’e cu e castigo mester manda un señal na politico y comunidad general cu soborno no ta normal ni na Aruba ni na ningun parti di mundo. Pa e motibo aki el a impone cuater aña di prizon, kitando e dianan cu el a sinta den KIA. Pa 9 aña largo e no por participa den eleccion, e ni por traha den aparato publico.
Pafo Paul Croes, compaña pa su esposa Melony y su abogado mr. Illes, a bisa e cuatro ultimo añanan niun hende por imagina kico nan ta pasando aden. “Un proceso cu a siña nos hopi , pa madura tambe. Psicologicamente, financieramente y emocionalmente e cuatro añanan tabata un presion hopi grandi, “ e ex mandatario a bisa.
