Diferente parlamentario, formando parti di e comision fiho di Infrastructura y medio ambiente, tabata t’ey presente na Parkietenbos di bishita, pa por haya un update, informacion y splicacion, con leu e parti di e proceso di e incinerator ta, pa asina e por cuminsa funciona.
Segun Alan Howell, parlamentario di partido POR y presidente di comision fiho, e cambio cu tur ta desea, no a mira ainda. Pero si por bisa cu ta yegando na e forma y e proceso unda cu tur ta desea pa mira pa deshaci di desperdicio na un forma mas sano.
A haya un splicacion di e diferente miembronan di DOW, entre otro e director, Marlon Croes, kende a bin duna un splicacion riba e forma con e incinerator ta bay funciona. Tin di agrega cu e ta un alegria pa mira toch cu e proceso ta canando como debe ser. Ohala cu pronto por haya den un forma mas profesional pa por kima loke ta sushi domestico, industrial y medico, Howell a bisa.
Tur esaki mester cana na un manera apropia. “Nos ta den 2021. No por sigui atende cu desperdicio na e manera aki mas. Tin di compronde di e miembronan di DOW cu pa fin di maart e proceso aki ta cuminsa.”
Howell a agrega cu e desperdicio di hospital tambe ta yega eynan na Parkietenbos. E parlamentario ta spera cu un dia prensa por haya un tour na Parkietenbos, pasobra hopi biaha tipo di cosnan asina ta mescla cu politica. Aki informacionnan ta bay perdi. Influencia politico ta stroba e esencia, y e parti cu ta bon pa nos pais.
