Cuidadanonan indigna buscando servicio na MFA Paradera no a logra haya esaki y a lanta cu e personal di siguridad.
Den oranan tempran di mainta den un fila masha largo, cuidadanonan a cuminsa perde pasenshi debi cu nan no ta haya number of nan no por haya e servicio cu nan ta buscando na diferente instancianan di Gobierno.
Entre otro e pago di plachi number cu ta trece un cantidad grandi di hende. Relaciona cu esaki tin cu tene na cuenta e reglanan stipula pa DVG riba aglomeracion y distancia social. Na MFA Paradera, pero tambe na otro localidadnan, por a mira fila largo, pero na Paradera e situacion a bay un poco for di man y a cuminsa lanta cu e seguridad.
A duna un splicacion riba e cantidad limita cu nan tin pa atende cu publico, cu ta 40 hende pa dia y mas cu esaki nan no por pasa. Mientras na sitio tabata tin algo mas cu 60 hende buscando forma pa cay den e cantidad cu ta atende pa e dia y reclamando cu nan ta di mainta tempran para den e fila ey. Polis a presenta na asisti y calma e situacion.
Varios ta esnan cu a bandona sitio pero vociferando fuertemente nan disgusto pa e sistema caotico cu ta atende cu pueblo na e departamentonan di gobierno.
