Fundashon Kontakto ku ta guia persona ku limitashon intelektual leve òf moderá; a realisá nan di sinku edishon di e proyekto “Day on the Job, Yes I Can!” dia 12 si september 2018. Ku e proyekto Day on the Job, Yes I Can!
Fundashon Kontakto a duna tur su klientenan ku ta funshoná semanalmente riba kada departamento na Wenkel di Fishi I i II e oportunidat pa sali i eksperiensha un mainta di trabou na diferente empresa. Di e forma aki e klientenan a haña e oportunidat pa sera konosí ku diferente tereno di trabou den nos komunidat i alabes demostrá nos komunidat ku SI NAN POR, ta ábil i por funshoná riba e tereno laboral.
Pa e proyekto di e aña aki Fundashon Kontakto a aserka 50 empresa i den nan tin 36 empresa ku a kompromete nan mes ku nan klientenan.
E empresanan ku a komprometé nan mes ku Fundashon Kontakto ta mira espasio i ta habri pa aseptá nos klientenan den nan seno laboral. Riba e dia aki e kliente nan a bai di 9or di mainta pa 12or di mèrdia na e empresa pa ehersé algun trabou. Trabou nan manera limpiesa, waseret, kushina, kura, atministrashon leve i mantenshon ta trabou nan ku a wòrdu ehersé riba e dia aki. E empresa nan ku a koperá ku nos pa hasi e dia aki posibel ta: De Kikker, Parke Tropikal, Bureau Intellectuele Eigendom, Arvefa Verf fabriek, Leading Lady, Quality Motors, Elite, Aska, Big Smile, Grafitex, ACU, Curacao Office Supply, Baywest, Starbucks (tur 3 filial), Renassaince Hotel, MCB, Aquarium Petshop ( tur 3 filial ) Chogogo Resort, Livingstone Resort, Van den Tweel Supermarket, Rijdende Hondenwasser, Juice Bar, Kooyman ( 2filial ), Amazia, FJM Painting, Lions Dive, Komali, i algun empresa mas.
Ku e proyekto Day On The Job, Yes I Can! Fundashon Kontakto ke logra pa tur aña di nobo mas empresa eksperensha kon e ta pa traha ku un persona ku limitashon intelektual pa asina e empresa na nan turno sa kuantu abilidat e personanan aki tin. Di e forma aki Fundashon Kontakto ta traha riba e parti di konsientisashon di nos pueblo pa ku e grupo di enfoke aki. I nan ta demostra ku nan tambe por partisipa den e mundu laboral di nos pais. Sperando ku mas oportunidat pa trabou temporal òf fiho por habri pa e grupo di enfoke aki.
Nos ke jama un danki spesial na tur e empresa nan ku ta kopera ku nos pa e proyekto aki por a wordu realisa.
Taizy Goeloe- Sluis terapista laboral di Fundashon Kontakto a habri e mainta aki dor di duna algun palabra di enkurashamentu i sosten pa e proyekto aki pa no entrega e lucha di konsientisashon i integrashon di nos hende nan ku un desabilidat mental den nos komunidat.
