Como Bucuti Tara Resort nan ta haya un prioridad pa Aruba pa soluciona e problema di e cantidad di cacho y pushi cu tin riba caya. Pa cuminsa, pasobra ta stima animalnan na e hotel. Pero ta kere tambe den apoya comunidad. Bucuti ta un hotel cu ta conoci pa ta uno cu ta sostenibel. Parti di ta sostenibel di un practica sostenibel tambe, ta apoya comunidad. Ta kere cu esaki ta un problematica cu ta existi hopi aña caba, cu hopi hende ta purba di soluciona na un manera chikito. Tin hopi fundacion cu ta trahando masha duro mes pa yuda tur e cacho y pushinan riba caya. Pero e ta un problema grandi. E unico manera pa solucion’e, ta cu un empuhe grandi asina y cu un apoyo financiero grandi. Sino bo no ta yega na un solucion. Ta haci’e cu tur curason. Pero tambe pasobra kier soluciona e problema aki pa comunidad cu si ta kere ta un problema grandi pa nos localnan pero tambe nos turistanan cu ta mira e problema riba caya.
Gobierno tambe por bisa cu nan ta haya comentario, Bucuti mes ta haya comentario y e fundacionnan tambe, cu nan ta haya cacho y pushinan bandona riba caya. Aunke nan ta mira cacho mas. Nan ta sinti eynan cu e Arubianonan no tin cariño pa animal. Ghandi a bisa cu un populacion ta wordo husga na e manera con e ta trata su animalnan.
Campaña lo sigui
Esaki lo sigui na un manera mas agresivo atrobe. Kier haci un fase super agresivo na 2018. E fondonan cu tin te awor aki ta cu e hotel ta bay duna un otro 250 mil florin pa cuminsa. A haya un compromiso tambe di Tourism Product Enhancement Fund (TPF) nan tambe ta contribuyendo na 2018. Ta spera cu por haya mas contribuciona inda. Cu e placa cu tin awo, lo sigui mas agresivo. Lo sigui paga 100% den e caso di e fundacionnan di rescate, plus kier trece bek e oportunidad pa e doñonan di cacho crioyo y pushi por registra pa haya un prijs special, bao di e programa aki pa baha e drempel pa tambe sterilisa nan cacho y pushi.
Con pa yega na Bucuti
Lo bay tin un website. E registracion lo bay cuminsa te na Februari, riba e website www.stimamisterilisami.com. Lo tin un registracion cu por registra. Tin algun voluntario cu ta yudando y nan ta duna e persona cu registra un number. Tin varios rekisito. Nan ta duna nan e number di registracion y cu e number ey por haci un afspraak na nan veterinario preferi, cu lo cobranan solamente e prijs special. E restro lo wordo cobra na e hotel.
Cuanto tempo
Segun LaSorte, tin 250 mil florin di e hotel y tin 95 mil florin di TPF. Esey por wanta pa mas of menos 7 of 8 luna. Tin speransa ainda pa haya mas fondo pa por sigui pa e resto di aña.
