Awe a drenta e di cuater barco crucero pa luna y a trece hopi turista. Esey ta significa cu e tour operators na waf, taxista, y e comerciantenan den Playa a haya benta.
Dalila Boye, tour operator, a informa cu e experencia tabata hopi positivo despues cu un aña y mey no tabata tin niun crucero cu a bin Aruba. E prome barco cu a drenta tabata Celebrity cu 500 turista. E hendenan aki a bin un tiki cuidadoso, pero awo Carnival a bini tur hende a haya un bida na Playa. El a compara ambos crucero y a indica cu turistanan di Celebrity tabata slow pa tour, mientras Carnival ta trece movecion pa henter Aruba. E dos barconan di Carnival Cruise a trece diferencia den Playa y por a mira esey n’e restaurantnan, rond di e tiendanan. Tur hende a haya un tiki, hasta tour operators, acuatico y parti di e taxinan.
Esaki ta prome biaha cu Anthony Heather, turista, ta sali for di Merca y a dicidi di bin pasa su vakantie na Aruba. El a bishita Welcome Plaza y a sintie bonbini cerca tur hende, ta un luga agradabel sin lubida e bon clima. Na momento cu nan a plania pa bin pasa vakantie na Aruba, door di e situacion di Covid-19 esaki a pone cu nan a bira nervioso. Nan tabata tin miedo di test positivo p’e virus, pero nan tur a percura pa vacuna. Asina mes nan ta percura pa cuida y mantene na e reglanan necesario.
Linda Budslaw ta un turista di barco crucero y te awo ta pasando dushi riba su vakantie. Nan no a pasa den ningun problema. Nan no a haya problema den restaurant, pero lo unico cu ta fastioso pa su persona ta cu casino ta druk. Como cu e barco crucero ta uno di casino, tin hopi hende. El a splica cu ora nan drenta un caminda, nan tin di uza nan tapaboca. Pa ora a baha fo’i barco, a informa nan cu ta oke pa cana sin e tapaboca, pero na momento di drenta un luga mester tin e tapaboca.
E tabata na Welcome Plaza unda tabata tin hopi luga habri y por a haci compras. Esaki ta di dos biaha cu Budslaw ta bin Aruba y nan ta namora di e isla, p’esey ta recomenda pa bin aki.
Pa cobertura mas amplio, lesa e edicion di TREMPAN mañan.
