Lucas 6:45 ta para skirbi: E bon hende, for di e bon Tesoro di su curason, ta saca loke ta bon y e mal hende for di e mal tesoro, ta saca loke ta malo, pasobra for di e abundancia di curason su boca ta papia.
Tito 3:2 ta bisa: Pa no calumnia ningun hende, pa no ta pleitado, ma suave, mustrando tur consideracion pa tur hende.
Ta hopi necesario pa como mayor bo controla bo pensamento, pasobra ta bo pensamento ta guia bo, si bo pensamento ta malo constantemente, bo pensamento lo traha riba bo salud y sin bo nota bo presion lo subi pa falta di trankilidad.
Bon pensamento ta trece trankilidad y paz, pero mal pensamento ta kita felicidad.
Si den bo matrimonio tur momento tin discusion, pleito, violencia, ta e yega e momento pa bo sinta y papia y tuma nota di unda e cos aki ta bin.
Caminda mayor tin desconfiansa den su yiu e educacion ta bira dificil. Sin confiansa no tin speransa.
Pleitamento y discusion henter dia den cas no ta educacion, si un mucha ta tende solamente ora bo papia palabra malo cu ne. Ta bira tempo pa abo como mayor cambia bo manera di papia.
Ningun caminda no ta acepta insulto como educacion, pasobra esey no ta e forma adecua pa trata cu mucha, y solamente bo ta causa herida.
Mal pensamento ta trece desconfiansa, pasobra e ta bin di e fuente di maldad, cual ta hiba na destruccion.
Bo no por forma nada riba mal pensamento, pasobra e no tin fundeshi y un ora pa otro henter un relacion por habri for di otro, pasobra mal pensamento ta traha un pelicula den bo mente caminda abo mes ta e actor principal.
Mas bo laga mal pensamento dirigi bo bida, mas amarga bo bida lo ta , y mas amarga lo abo lo haci bida di henter bo famia.
2 Corintionan 10:5 ta para skirbi: Pa destrui tur speculacion y tur arogancia cu ta lanta contra e conocemento di Dios, hibando den cautiverio tur pensamento, pa haci nan obedecido na Cristo.
Tur pensamento malo ta contra e palabra di Dios. P’esey ta imposibel nos por laga pensamento malo domina nos bida, y tur dia nos ta lanta y papia malo.
Con bo por traha ma un luga caminda bo no ta confia ningun hende y tur dia bo ta spera nan haci bo algo malo.
Imagina bo ta traha como polis of den enfermeria, bo por confia bo colega?
Tin un palabra cu yama pordon, cu tin solamente 6 letter pero e tin un balor di miyones of un balor cu bo no por alcansa na placa, pasobra ora bo pordona di curason tur mal pensamento ta bay.
Ta esey ta sosode ora nos arepenti , aparta for di maldad y mal pensamento, pasobra mal pensamento tambe ta pica, ora bo papia malo di un hende of desea malo pa un hende, ta pica.
Laga Cristo drenta den bo bida y duna Cristo e luga pa goberna bo curason.
