“E ta yena nos cu masha alegria y satisfaccion pa mira cu nos usuarionan ta aprecia y ta sostene nos. Pero nos ta mas orguyoso ainda di a crece di un forma impresionante den e ultimo dos lunanan, kibrando tur otro record”, asina Mark-Benson Denz, director di Headlines Group, cas editorial di e portal di noticia 24ora.com, a bisa awe na un ocasion special. E media mas grandi di Aruba a surpasa 100,000 siguido (Followers) riba e red social Facebook. Ayera so a haya como 600 siguido nobo riba Facebook, cu a haci cu a surpasa e cifra di 100 mil.
Awe e pagina di Facebook di 24ora.com a lanta cu 88,462 likes y 100,199 followers. Nos ta e pagina riba Facebook cu mas “likes” y mas “followers” di Aruba. E diferencia entre un “Like” y un “Follower” ta cu un persona cu gusta e pagina y a scoge pa pone su nomber na e pagina como un fanatico. Un siguido ta un persona cu a scoge pa ricibi publicacionnan actualisa cu Bo publica riba su “newsfeed”. Den e caso specifico aki, tin mas cu 100 mil diferente persona cu ta ricibi noticianan di 24ora.com riba nan newsfeed di Facebook tur dia, henter dia!
Cu esaki, 24ora.com ta sigui fortifica su posicion di lider den e industria di noticia riba nos isla. Aña pasa e video mas mira riba Facebook di 24ora.com tabata un noticia di detencion despues di Jouvert Morning, riba dia 24 di februari 2019. No menos di 339 mil hende a mir’e! E di dos video miho mira, pero cu mas minuut mira den henter e aña tabata e entrevista exclusivo cu a tene cu e mama di e mucha muhe cu nan a viola, di cual e tata a asesina e violado cu un machete. E entrevista haci dia 1 di juni 2019 a wordo mira dor di mas cu 86 mil usuario, cu a mira no menos di 348 mil minuut di e mesun video.
Pa loke ta e website mes, aña pasa a conta cu 1.607.125 usuario durante henter aña, cu ta un crecemento di 13.61% compara cu aña 2018. Ta interesante pa menciona cu e “pageviews” tambe a crece enormemente te na 43.738.239 durante henter aña. E tempo cu cada usuario ta keda riba nos site tambe ta aumentando gradualmente. Pa e aña aki, nos a crece cu 25% di usuarionan nobo pero mas cu 30% di usuarionan nobo. A nota cu despues di luna di maart e crecemento a bira mas grandi. Por ehempel, dialuna dia 23 di maart tabata e dia mas mira di nos website e aña aki, cu 60.873 diferente usuario riba un solo dia. Esey ta un crecemento di 104% compara cu mesun dia aña pasa.
Ta bon pa señala cu riba e plataforma di Facebook mes, e videonan publica a conoce un crecemento masha grandi mes, specialmente despues di luna di maart tambe. Semper e videonan ta bon mira, pero awo a crece mas. A bin 15 mil followers nobo e aña aki so. Cada biaha cu tin un evento bibo, cu mesora ta nota un crecemento den e cantidad di siguidonan. E minuutnan cu ta mira di videonan a subi di forma impresionante, demostrando cu publico tin mas demanda pa mira videonan, specialmente cobertura bibo.
Tocante 24ora.com
Mark Benson Denz a funda e prome website di noticia na Aruba, 24ora.com (Prome den Noticia) dia 28 di maart 2007. Awendia e ta e medio di comunicacion mas grandi na Aruba. Diariamente mas di 30 mil diferente usuario ta subi online, mas di 4 biaha y ta keda casi 3 minuut cada biaha. Pa siman ta surpasa 85 mil usuario y pa luna e ta mas di 300 mil diferente usuario. Riba Facebook nos ta e pagina di Aruba mas mira, mas sigui y cu mas “engagement”.
