Tabata un momento di basta alegria y aplauso ora cu famianan para na waya a mira yegada di e avion di carga di Fast Delivery. Pilotonan local a sali for di Merca cu e avion y yega Aruba Diamars atardi. Cu un bon bini special di bomberonan a ricibi e avionnan. A prepara dos piloto cu a keda varios luna na Merca pa completa tur cos pa por a sali cu e avion prepara y adapta pa bula cu carga. E tin un capacidad di 900 kilo. E avion di dos motor lo bula islanan ABC. Richard Helder doño di Fast Delivery a splica cu ta mas cu tres aña nan tabata bezig. Un team di cinco profesional local cu amplio conocimento den aviacion a traha riba e manualnan pa finalmente logra keda cla cu Aivacion Civil tambe di Aruba pa trece e avion.
Awor ta trahando pa pronto keda cla cu e AOC y haya e registracion di Aruba mes e aña aki ainda. Djey por bula comercial cu carga. Awor aki nan por mas bien hiba carga di nan compania pa e otro companianan di Fast Delivery entre ABC. Asina cu esaki keda cla, e esfuerso lo sigui pa amplia e cantidad di avion y mas grandi pa distancia mas largo. Hopi biaha no tin manera pa hiba trece carga entre e islanan ABC. Mester charter un avion of mester warda container. Cu Aruba su prome avion oficial di Carga, e avion lo bula tur dia y asina cumpli cu e demanda existente. Pabien na full e team y tambe na e pilotonan local cu henter e staf y tambe famianan ta orguyoso di nan. Famia a gradici Fast Delivery pa e confiansa duna na nan ser keri. E pilotonan Renee Picus y tambe Ashley Croes a trece e avion Aruba despues di tur preparacion na Merca.
