Recientemente Conseho Insular a organisa un encuentro informal cu miembronan di Conseho Insular di Sint Eustatius y Saba, cu e meta pa estrecha e lasonan cu e coleganan di e dos islanan di Isla Riba. Ambos delegacion cu a biaha pa Boneiro relaciona cu celebracion di Dia di Boneiro, tabata invitado tambe pa e reunion solem na Passangrahan.
Durante e encuentro informal a papia tambe tocante diferente topico di interes comun, entre otro cuido di salu y seguro di malesa, coherencia entre e islanan y entre Hulanda Caribense y Hulanda Europeo, e cambionan cu Ministerio di Asuntonan Interno y Relacionnan den Reino (BZK) a propone unilateralmente den WolBES y FinBES y e cambionan proponi den e sistema di impuesto.
E desaroyonan recien aki y e preocupacionnan na tur e tres islanan a duna un impulso nobo na e idea pa fortifica e colaboracion mutuo y crea un plataforma permanente caminda conseho insular di e tres islanan por topa cu otro, delibera, atende cu e problemanan comun y forma solucion y opinion comun na un manera regular y structural.
