E dokter di presidente Mericano, Donald Trump, a reconoce cu e mandatario no ta for di peliger y ta den un tereno no explora pa otro pashentnan di COVID-19. Esaki ta debi na e tipo di tratamento cu ta duna Trump.
E presidente a anuncia di lo ta bek den White House awe tardi pa 6:30, pero Sean Conley a defende su decision di lag’e bay despues di tres dia. “Nos ta riba un tereno no explora, ora ta trata di un pashen cu a ricibi e tipo di terapia cu el a haya,” segun Conley. E dokter a sigui bisa segun su experencia medico, cu pashentnan di COVID-19 ta vulnerabel durante un periodo cu ta dura shete pa dies dia desde cu ta registra e prome sintomanan. Trump no a yega e punto ey, pero cu cautela optimista cu tur cos lo bay bon.
Na White House e lo tin un dokter personal cu t’ey p’e 24 ora. Hopi pashent di Coronavirus ta mustra relativamente sano pero ta bira pio durante e periodo di shete pa dies dia. Trump ta un di e prome pashentnan conoci di COVID-19 di a suministra un combinacion di tratamento potente manera cocktail experimental di anticuerpo di farmaceutica Regeneron; e antiviral Remdesivir y steroid dexametasona.
E dokter a nenga cu Trump a presiona su team medico pa bolbe White House mas trempan. Conley a hasta defende su decision pa laga e presidente sali diadomingo den su vehiculo cu varios miembro di Servicio Secreto, pa saluda su simpatisantenan pafo di hospital.
