Claro cu tur mandatario tin derecho riba algun dia di vakantie, pero memey di un crisis constitucional cu Hulanda, sin cu Aruba tin fin di cumpli cu e acuerdo di fiansa y sin cu a soluciona un lista di problemanan na cas, awe mainta Minister Presidente mr. Evelyn Wever-Croes a sali pa Merca pa algun dia di vakantie. El a haci esaki precisamente den e siman di vakantie di scol y a hiba su famia cu ne tambe den e trip. Consecuentemente Minister mr. Andin Bikker ta encarga cu e funcion di Minister Presidente e siman aki.
Cu varios reunion andando den parlamento y cu un conseho di e mesun prome mandatario na comunidad pa no biaha si no ta necesario y pio pa areanan contagia, awe e mes a subi avion y biaha pa un destino cu ta bou bastante presion di contagio. Dor di haci esaki, ora e yega Aruba e lo tin cu haci un test y bay den cuarentena pendiente resultado di e testnan haci.
Politicamente semper vakantie di ministernan ta bira un discusion. Hopi biaha, lamentablemente, comunidad no ta duna e mandatarionan un chens pa por descansa di nan responsabilidad pisa. Kisas ta compara ministernan cu otro y ta conclui cu tur mester ta mesun cos na dedicacion y sin tuma vacacion.
Kisas no ta e vakantie, sino e “timing” den cual a scoge pa bay cu vakantie ora cu henter Aruba ta kedando cas, ta cuidando curpa di Covid-19 y ta spaar pasobra situacion no ta bon. Mientras cu no tin ningun garantia con ta sigui cu FASE y subsidio di salario despues di Pasco, awe e maximo mandatario Arubiano a opta pa laga tur cos atras y bay disfruta algun dia di shopping y relaha.