PKF Aruba su mentorship program, e unico y prome na Aruba, cu un focus total riba e studiantenan di examenklas, a conclui dialuna cu “Unlocking Gen-Z potential” mentorship program di PKF Financial Services Aruba na Abraham de Veerschool. E programa aki a cuminsa na comienso di aña escolar 2023-2024 cu un enfoke riba empodera e studiantenan di generacion-Z cu conocementonan cu por yuda nan crece como lidernan di mañan.
Nan a tene e programa aki tur dialuna na Abraham de Veer School, unda nan a comparti conocemento y experiencia cu tur studiante den examenklas riba topiconan importante manera time-management, self-discipline, poder di nan scogencianan personal y tambe profesional, public-speaking, etc.
Durante e programa aki nan a invita dos invitado, Jason Gerling, co-fundado di Body Zone Gym Aruba, cu a guia e studiantenan riba e topico di self-confidence. El a inspira y guia studiante pa tin un ‘mindset’ positivo y a duna conseho practico pa cultiva confiansa propio. Den un otro sesion nan a presenta Nicholas Gordon, ex-alumno di Abraham de Veer School y fundado di Kulture Café den San Nicolas, cu a yuda pa inspira y comparti su storia
personal cu e studiantenan di su testimonio cu como un MAVO-Student te na bira e fundado di Kulture Café na San Nicolas.
E sesion final a tuma luga dialuna, cu un discurso di motivacion cu Jonathan Thiel, miho conoci como Jeon. E a inspira e studiantenan cu su storia personal, di su logronan y retonan. Na mes momento a motiva cada studiante pa sigui nan
soño y caminda di exito.
Cu e programa aki PKF Financial Services a trece e conocemento y experiencia necesario pa prepara e studiantenan pa nan siguiente paso den bida profesional y personal. Nan ta masha orguyoso di cada un di nan y ta desea nan tur exito cu nan
eindexamen den e proximo simannan.
A funda PKF Financial Services Aruba na juli 2023, y asina’ki ta refleha bek riba nan compromiso pa crea cambio positivo den nos comunidad. Nan ta orguyoso di e impacto positivo cu e programa tin riba studiante, specialmente na un momento cu
programanan asina ta necesario y importante den nos comunidad. PKF Financial Services Aruba ta comprometi pa sigui e programa aki, inspirando y guiando mas studiante posibel cu nan futuro.
Nan ta sigur cu e programa aki lo inspira otro pa duna bek na comunidad door di comparti nan conocimento profesional y experiencia cu e generacion nobo y asina sigui guia nos futuro lidernan.
Tocante PKF Financial Services Aruba
Dia 3 di juli 2023 a funda e oficina di PKF Aruba oficialmente na Aruba. PKF ta un compania mundialmente reconoci riba tereno di Consultancy, Audit, Tax y Accounting. A funda e oficina di PKF Aruba cu e meta pa inverti, desaroya y yuda e
futuro generacion di profesional local crece y principalmente pa comparti nan experiencia y conocemento cu comunidad.
PKF International, cu antes tabata yama “Pannell Kerr Forster” ta un red di agencia global di accountancy. E ta conta cu mas di 215 miembro independiente cu ta opera bou di e marca PKF den mas di 150 pais parti den cinco diferente region. Hunto nan ta conta cu 20.000 profesional y awendia e ta postula na posicion number # 14 di e miho red di accountantnan na mundo.
A funda PKF na aña 1969, ora cu cuater oficina di accountant di Australia, Canada, Inglatera y Merca a uni pa crea un asociacion internacional. Na aña 1980 e miembronan a dicidi pa uza “Pannell Kerr Forster” como nan marca comun. Na aña 2000 a dicidi pa, en bes di uza e nomber completo, pa uza e abreviacion, esta PKF.
Tocante Edsel Lopez
Edsel N. Lopez ta un persona conoci na Aruba. E tin un historia exitoso di hopi aña di experiencia den assurance y advisory business door di traha cu e companianan di mas grandi di Hulanda y Caribe Hulandes. E la bira e promer partner Rubiano den e oficina di accountant PwC di Caribe Hulandes na aña 2001.
Tocante Herbert van Elferen
Herbert van Elferen ta un accountant certifica. El a start su carera profesional na aña 1996 y ta conta cu riba 25 aña di experiencia, cerando buki y liderando e mundo di accountancy y advisory na comercio local.
Tocante Ruthmila Steward
Ruthmila Steward a cuminsa su carera profesional na aña 2016 trahando na PwC Aruba. Unda el a siña y crece den su ramo y despues di shete aña, a dicidi di tuma un reto diferente den su carera profesional y asina a cuminsa cu Edsel y Herbert
na 2023 cu e lansamento di PKF Financial Services Aruba. Aki ta unda tur tres profesional den nan ramo a tuma decision di cuminsa un etapa profesional nobo y asina inclui e programa aki den nan agenda tur dialuna pa comparti asina e values cu PKF ta para p’e.
Kico PKF tin pa ofrece
E nivel di mas halto di servicio y experiencia tecnico di experto local y rond mundo. E oficinanan di miembronan di PKF International tin un reputacion di excelencia den tur area di impuesto, advisory, auditoria y solucion comercial. Hunto ta compronde retonan cu e cliente ta enfrenta y e importancia di tuma decision firme y cu un enfoke flexibel den
un ambiente compleho. Nan ta yuda bo haya solucion adecua di un forma rapido y sigur. Na PKF nan sa cu cada negoshi ta diferente. Ta pa e motibo ey mes ta adapta nan servicio pa satisface e necesidadnan specifico di cada cliente. E servicionan di PFK Aruba ta encera entre otro “Corporate Financial Services”, “Business Advisory Services”, “Valuation Services”, Tax & Legal Services” y “Financial Statement Services”. Pa mas informacion por tuma contacto cu PKF Aruba na +297 6990990 of via email [email protected].
Tocante Jeon
Jonathan Bryan Thiel, conoci artisticamente como “Jeon Arvani”, ta naci na Aruba dia 27 di januari 1991, pues tin apenas 32 aña di edad. El a produci riba 500 cancion durante su carera musical, cu ta inclui albumnan manera Biggy Boy Forever, Santa Cruz y Otra Noche.
Na aña 2018 el a graba e hit “Machika” cu J Balvin y Anitta. Hunto a logra un “Platinum Album” mientras cu a stream e cancion mas di 100 miyon biaha riba Spotify den mas di 60 pais rond mundo.
E ta conta cu nominacionnan pa “Latin Grammy Award for Record of the Year” y “Lo Nuestro Award for Urban Collaboration of the Year” cu e cancion “X” di Nicky Jam y J Balvin na aña 2018. El a yega di presenta cu concierto di Chris Brown, Don Omar, J Balvin, Romeo Santos, Juan Luis Guerra, Gente de Zona, Zion & Lennox y hopi mas.
Localmente el a lansa megahitnan manera “Dushi bida” y “Ta mi hendenan”. Na aña 2016 el a gana e premio di artista, cancion y video di aña, pa e cancion “Dushi Bida”. Na 2017 Tourism Corporation Bonaire a reconoc’e cu e medaya di oro como embahador. Na 2018 a reconoc’e como embahador di Corsou.
